गोकुल पराजुली
विराटनगर, मङ्सिर २१ गते । जोगबनी हुँदै विराटनगरसँग जोडिएको नाकामा रहेको सय वर्षअघि निर्माण भएको पुल एक वर्ष बन्द भएर पुनः सञ्चालनमा आएको छ । भारतको बिहारमा रहेको मीरगन्ज पुल हिजो मंगलबारबाट पुनः सञ्चालनमा आएको हो ।
पुल सञ्चालनमा आएपछि मालवाहक सवारी साधनलाई नेपाल पुग्न सहज भएको छ । यसअघि करिब १२० किलोमिटर लामो बाटो तय गर्दै सुनसरीको भाण्टाबारीबाट नेपाल आउनुपर्ने बाध्यता थियो ।
तेस्रो देशबाट भारतका कोलकत्ता, विशाखापट्नम, मुम्बई, अमहदावाद जस्ता बन्दरगाह आइपुग्ने औद्योगिक कच्चा पदार्थदेखि खाद्यान्नसम्मका वस्तुहरू भारत बिहारको जोगबनी हुँदै विराटनगर भित्रने गर्थे ।
‘करिब १२ महिनापछि मीर गन्ज पुल सञ्चालन गर्न दिन भारतीय पक्ष राजी भएको छ’, मोरङ व्यापार सङ्घका निर्देशक कृष्ण रेग्मीले भन्नुभयो ‘मंगलबार साँझदेखि मालवाहक साधनहरू नेपाल प्रवेश गर्न थालेका छन् । अब आयात व्यापारमा सहजता आउने निश्चित छ ।’
नेपाली र भारतीय पक्षका सरोकारवालाबीचको सहमतिमा भारतीय पक्ष पुल खुलाउन सहमत भएको हो ।
मंगलबार भएको छलफलमा भारतका तर्फबाट आइसीपी प्रबन्धक रत्नकर यादव, एसडीएम एस कुमार, एनएच आई उमेश यादव र भाजपा नेता दिलीप झा सहभागी हुनुहुन्थ्यो ।
नेपालका तर्फबाट मोरङ व्यापार सङ्घका विनित सिंहानिया, मनिष मारु, सुशील सुरानालगायतका पदाधिकारीहरू सहभागी भएको निर्देशक रेग्मीले जानकारी दिनुभयो ।
विराटनगरका उद्योगी व्यवसायीले सात वर्षयता मीरगन्ज पुलको समस्या खेप्दै आइरहेका छन् ।
अङ्ग्रेजकै पालामा बनेको झण्डै सय वर्ष पुरानो फलामे पुल भासिने समस्या रहेको छ ।
-original-thumb.jpg)
