चिनियाँ राष्ट्रपति सी चिनपिङको साउदी अरबियामा राजकीय भ्रमण हुँदै

गोरखापत्र अनलाइन 

काठमाडौं, मङ्सिर २१ गते । चिनियाँ राष्ट्रपति सी चिनपिङ तीनदिने साउदी अरयिबा राजकीय भ्रमणको लागि बुधबार त्यता प्रस्थान गर्नु लाग्नुभएको छ । विश्वको सबैभन्दा ठूलो तेल निर्यात गर्ने देश साउदी अरबियाका राजा सलमानको औपचारिक निमन्त्रणामा उहाँ त्यसतर्फ प्रस्थान गर्न लाग्नुभएको हो ।

विश्वव्यापी कोरोना भाइरस सङ्क्रमण फैलिएपछि उहाँको तेस्रो वैदेशिक भ्रमण र सन् २०१६ देखि साउदी अरबियामा पहिलो भ्रमण हुँदैछ ।

दुई देशबीचको ऐतिहासिक सम्बन्ध र रणनीतिक साझेदारी स्थापित गर्नको लागि यस भ्रमणसँगै उच्चस्तरीय शिखर सम्मेलन आयोजना हुने साउदी प्रेस एजेन्सीले मंगलबार जनाएको छ ।

सहमतिअनुसार २९२ खर्ब ६० अर्ब अमेरिकी डलर बराबर आर्थिक सहयोग चीनद्वारा साउदी अरबियालाई दिने विषयमा सम्झौतापत्र  हस्ताक्षर हुनेछ ।

चिनिया विदेश मन्त्रालयका प्रवक्ता हु चुङयिङले राष्ट्रपति सीले साउदी अरबियामा राजकीय भ्रमण गरेर रियादमा हुने पहिलो पटकको चीन र अरब राष्ट्रहरूको सम्मेलन तथा चीन र जीसीसी सम्मेलनमा भाग लिने जानकारी दिनुभयो ।

अमेरिका र पश्चिमी शक्ति राष्ट्रहरूसँगको सम्बन्धमा चिसोपन बढ्दै गएपछि चीनले मध्यपूर्व देशहरूमा आफ्नो कूटनीतिक सम्बन्धहरूलाई गहिरो रूपमा स्थापित गरिरहेको छ ।

सो शिखर बैठकमा राजा सलमानद्वारा अध्यक्षता गर्ने र राजकुमार मोहमद बिन सलमानले भाग लिने बताइएको छ । राजकुमार मोहमद बिन सलमानले रियादमा राष्ट्रपति सीलाई भव्यतापूर्वक स्वागत गर्ने कार्यक्रममा राखिएको छ । जुलाईमा भएको अमेरिकी राष्ट्रपति जो बाइडेनलाई साउदी अरबियाले मौन स्वागत गरेर उच्च प्राथमिकतामा राखेको थिएन ।

साउदी अरबियाका विश्लेषक अलि शिहावीले राष्ट्रपति सीको भ्रमणले पछिल्ला समयमा दुई देशबीच स्थापित दौत्य सम्बन्ध झन् प्रगाढ हुने विश्वास गर्नुभएको छ । – उपेश महर्जन (अलजजिराको सहयोगमा )