१९ औं हस्तकला व्यापार मेला मङ्सिर २३ गतेदेखि

काठमाडौं, मङ्सिर १३ गते । यही मङ्सिर २३ गते शुक्रबारदेखि २७ गते मङ्गलबारसम्म राजधानीमा १९ औं हस्तकला व्यापार मेला हुने भएको छ ।

नेपाल हस्तकला महासङ्घको आयोजनामा सो मेला हुन लागेको हो । बौद्धस्थित होटेल हायात रिजेन्सीमा हुने मेलामा हस्तकलाका वस्तुहरुको १५० वटा स्टल रहनेछन् ।

नेपालमा प्रत्येक वर्ष नियमित रुपमा अन्तर्राष्ट्रियस्तरको व्यापार मेला हुने सन्देश स्थापित गर्ने प्रयास स्वरुप विगतमा झैं यस वर्ष पनि मेलाको आयोजनालाई निरन्तरता दिइएको महासङ्घका अध्यक्ष प्रचण्ड शाक्यले पत्रकार भेटघाटमा जानकारी दिनुभयो ।

‘ नेपालमा हरेक वर्ष त्यही समयमा वार्षिक कार्यक्रमको रुपमा व्यापार मेला हुने सन्देश प्रवाह अन्तर्राष्ट्रियस्तरमा प्रवाह गर्न हामीले भरमग्दुर प्रयास गर्दै आएका छौं । यस पटकको मेलालाई पनि सोही प्रयासको कडीको रुपमा लिएका छौं ।’ अध्यक्ष शाक्यले भन्नुभयो हरेक वर्ष एकै समयमा मेला हुनेलाई अन्तर्राष्ट्रिय रुपमा स्थापित गर्न खोजे व्यापारसँगै विदेशी पर्यटन प्रवर्द्धन गर्न सघाउने छ ।’

अन्तर्राष्ट्रियस्तरमा सो मेलाको प्रवर्द्धनका लागि महासङ्घका अतिरिक्त नेपाल सरकारका कूटनीतिक नियोग र अन्य निकायसँग समन्वय गर्दै आएको पनि अध्यक्ष शाक्यले बताउनुभयो । 

मेलाले हस्तकलाको सामग्रीहरुको राष्ट्रिय तथा अन्तर्राष्ट्रियस्तरमा बजार प्रवर्द्धन, हस्तकलाको सामग्रीको बजारको विकासमा टेवा पु¥याउने, हस्तकला र नेपाली संस्कृतिको सम्बन्ध बुझाउन महत्वपूर्ण भूमिका निर्वाह गर्ने विश्वास महासङ्घले लिएको छ ।

मेलामा नेपालमा बनेका र नेपालमै बनाउँ अवधारणा अनुरुप वस्तुहरु प्रदर्शन हुने पनि महासङ्घले जनाएको छ ।

महासङ्घका अनुसार मेलाको अवसर पारेर ७० वर्ष नाघेका ज्येष्ठ नागरिकको कलाकारको सम्मान, गत आर्थिक वर्षमा हस्तकलाका सामग्री निर्यात गर्ने अग्रणी निकासीकर्ताहरुलाई सम्मान गरिनेछ । 

मेलासँगै १७ औं हस्तकला प्रतियोगिता पनि हुने महासङ्घले जनाएको छ । काष्ठकला, प्रस्तरकला र सेरामिकको प्रयोगबाट मानव मुखाकृति भएको गरुड बनाउने विधा र प्राकृतिक रेसाहरुको प्रयोगबाट मफलर बनाउने प्रतियोगिता सञ्चालन गरिनेछ ।

कला प्रदर्शनी अन्तर्गत फिलगिरी, थोज्यामाज्या धातु पत्रकला र पौभा थाङ्का गरी तीन वटा विधामा कला प्रदर्शनी हुने पनि महासङ्घले जनाएको छ ।

करिब १२ अर्ब मूल्य बराबरको हस्तकलाका वस्तुहरु बर्सेनि ६० वटा देशमा निर्यात हुने गरेको पाइएको छ । महासङ्घका अनुसार हस्तकलामा करिब ८ लाख व्यक्ति संलग्न छन् । हस्तकलालाई नेपालको मुख्य निर्यातमूलक उद्योगका रुपमा लिइन्छ ।