हरिकृष्ण ऐडी
मुगु, कात्तिक १६ गते । नेपाल विद्युत प्राधिकरणका कार्यकारी निर्देशक कुलमान घिसिङले नेपाल विद्युत प्राधिकरणको वितरण तथा ग्राहक सेवा गमगाढ वितरण केन्द्रको अनुगमन गर्नुभएको छ ।
असोज तेस्रो हप्ता परेको अविरल वर्षाका कारण आएको बाढीपहिरोले छायाँनाथ रारा नगरपालिका वडा नं– ६ मा रहेको गमगाढ जलविद्युतको क्यानल तथा नहरमा क्षति पुगेको थियो ।
अनुगमनका क्रममा कार्यकारी निर्देशक घिसिङले अवरुद्ध विद्युत् एक महिनाभित्र मर्मतकार्य सम्पन्न गरेर सुचारु गरिने बताउनुभयो । कार्यकारी निर्देशक घिसिङले मुगुलाई यसै आर्थिक वर्षभित्र राष्ट्रिय प्रसारण लाइनमा जोडिने बताउनुभयो ।
वितरण केन्द्रले विद्युत् उत्पादन बन्द भएसँगै बुधबारदेखि दैनिक पाँच घण्टा जेनेटरको माध्यमबाट विद्युत् उत्पादन गरेर वितरण गर्ने भएको छ ।
वितरण केन्द्र कार्यालयको जानकारी अनुसार ३ सय २० केभी क्षमताको जेनेरेटरबाट २ सय ५० किलोवाट विद्युत् उत्पादन हुनेभएको हो ।
वितरण केन्द्रका कार्यालय प्रमुख दिनेश पौडेलले उपभोक्ताको सहजताका लागि वैकल्पिक विद्युत् उत्पादनका लागि नेपाल विद्युत प्राधिकरणको जेनेरेटर त्रिशूलीबाट ल्याएर विद्युत् उत्पादन गर्न लागिएको बताउनुभयो ।
उहाँका अनुसार जेनेरेटरबाट दैनिक चारदेखि पाँच घण्टा विद्युत् उत्पादन हुँदा दैनिक ६० हजार रुपियाँ खर्च हुने अनुमान छ । कार्यालय प्रमुखका पौडेलका अनुसार सोही अनुपातले हिसाब गर्दा मासिकमा १८ लाख रुपियाँ खर्च हुन आउने अनुमान छ ।
वितरण केन्द्र, कार्यालय मुगुका अनुसार अविरल वर्षाले पानी बग्ने क्यानलमा जमिन नै भासिएपछि १ सय २७ मिटर नहर पूर्णरुपमा बाढी पहिरोले क्षति पुर्याएको हो । त्यसैगरी २२ मिटर क्यानल पुनः मर्मत गर्नुपर्ने भएको छ साथै १ सय ५ मिटर क्यानलमा सामान्य क्षति पुगेको छ ।
बाढीकै कारण यता गमगाढ वितरण केन्द्रको पावरहाउस आसपासमा राखिएका टान्समिटर लगायत विद्युत्को अर्थिङसमेत बगाएको छ । त्यस्तै गाउँमा विस्तार गरिएका दर्जनौं विद्युतका पोलसमेत बाढीले क्षति पुर्याएको छ।
