ब्रसेल्स, फागुन २० गते । अमेरिकी राष्ट्रपति डोनाल्ड ट्रम्पले इरानमाथि आक्रमणका लागि अमेरिकी आधार प्रयोग गर्न अस्वीकार गरेको स्पेनसँगको व्यापार तोड्ने धम्की दिएपछि युरोपेली आयोगले बुधबार इयु आफ्नो हित र सदस्य राष्ट्र स्पेनको सुरक्षा र आर्थिक हितको रक्षा गर्न पूर्ण रूपमा तयार रहेको स्पष्ट पारेको छ ।
आयोगका प्रवक्ता ओलोफ गिलले जारी गरेको विज्ञप्तिमा भन्नुभयो, “हामी सबै सदस्य राष्ट्र र नागरिकसँग एकतामा उभिएका छौँ र आवश्यकता परे हाम्रो साझा व्यापार नीति मार्फत इयु हितको रक्षा गर्न कार्य गर्न तयार छौँ ।” ट्रम्पले मङ्गलबार स्पेनका प्रधानमन्त्री पेड्रो सान्चेजको सरकारले रोटा नौसेना आधार र मोरोन एयर बेसको प्रयोग गर्न नदिएको र नाटोका लागि रक्षा खर्च बढाउने प्रतिज्ञा गर्न अस्वीकार गरेकोमा गम्भीर आपत्ति जनाउँदै स्पेनसँगको व्यापार बन्द गर्ने धम्की दिनुभएको थियो ।
गिलले भन्नुभयो, “युरोपेली आयोग संयुक्त राज्य अमेरिकासँग गत वर्ष सम्पन्न ठूलो व्यापार सम्झौताको प्रतिबद्धताको पूर्ण सम्मान अपेक्षा गर्छ । हामी दुवै पक्षको हितमा स्थिर, पूर्वानुमानयोग्य र पारस्परिक रूपमा लाभदायी ट्रान्साटलान्टिक सम्बन्ध कायम राख्न वकालत जारी राख्नेछौँ ।” साथै, आयोगले विश्वव्यापी अवरोधको समयमा यस्तो सम्बन्धको रक्षा पहिलेभन्दा बढी महत्त्वपूर्ण रहेको बताएको छ ।
सान्चेजको वामपन्थी सरकारले गाजामा इजरायलको युद्धको कडा विरोध र भेनेजुएलाका राष्ट्रपति निकोलस मदुरोको अपहरण र गिरफ्तारीको सैन्य कारबाहीका कारण वासिङ्टनसँग सम्बन्ध तनावपूर्ण बनेको छ । रासस/एएफपी
