बिष्णुप्रसाद पोखरेल
दमक, फागुन ४ गते । नेकपाकी नेत्री तथा झापा क्षेत्र नं. २ की प्रतिनिधिसभा सदस्य उम्मेदवार धर्मशिला चापागाईंले आफ्नो स्थानीय २० बुँदे चुनावी प्रतिबद्धतापत्र सार्वजनिक गर्दै मिटरव्याजीहरूमाथि कारबाही गरिने बताउनुभएको छ।
‘झापा–२ लाई समुन्नत, न्यायपूर्ण र समृद्ध बनाउने’ संकल्पसहित शिक्षा, स्वास्थ्य, पूर्वाधार र सुशासनलाई प्राथमिकतामा राख्दै उहाँले प्रतिबद्धतापत्र प्रस्तुत गर्नुभयो। समाजमा व्याप्त मिटरव्याजी समस्या समाधान गर्नेदेखि धार्मिक क्षेत्रहरूको विकाससम्मका योजना उहाँको प्रतिबद्धतापत्रमा समावेश छन्। विराटपोखरी, अर्जुनधारा, जलेश्वर धाम, सालबारी र निचाझोडा क्षेत्रको धार्मिक तथा पर्यटकीय विकास गर्ने योजनाहरू पनि उल्लेख गरिएको छ।
उहाँले भन्नुभयो, “समाजमा व्याप्त मिटरव्याजी समस्या समाधान, सामाजिक रूपमा बहिष्कृत व्यक्तिको पुनस्र्थापना, खानेपानी तथा सिँचाइ व्यवस्थापन, प्राविधिक र रोजगारमुखी शिक्षाको विकास, वैदेशिक रोजगारीमा हुने ठगी नियन्त्रण, युवाको नेतृत्व विकास र खेलकुद पूर्वाधार विस्तार मेरो प्रतिबद्धता हो।”
प्रतिबद्धतापत्रमा ‘एक वडा–एक पुस्तकालय’ अभियान, कृषि, पशुपालन र दुग्ध उत्पादन प्रवद्र्धन, किसानलाई मल तथा बीउ–बिजनको सहज आपूर्ति सुनिश्चित गर्ने विषयसमेत उल्लेख गरिएको छ। धर्मशिला चापागाईं पहिलो संविधानसभा सदस्यमा निर्वाचित भइसकेकी थिइन् र मन्त्री पनि बनेकी छिन्।
झापा–२ मा रोचक प्रतिस्पर्धा देखिएको छ। निर्वतमान सभामुख देवराज घिमिरे नेकपा एमालेबाट, निवर्तमान उपसभामुख इन्दिरा रानामगर रास्वपाबाट, सरिता प्रशाई नेपाली काँग्रेसबाट, भद्रप्रसाद नेपाल राप्रपाबाट उम्मेदवार रहँदै हुनुहुन्छ। डा. युवराज संग्रौला स्वतन्त्र उम्मेदवार हुनुहुन्छ।
-original-thumb.jpg)