जकार्ता, वैशाख १३ गते । इन्डोनेसियामा वातावरण तथा मानव अधिकार अभियन्तामाथि एसिड आक्रमण जस्ता हिंसात्मक घटना बढ्दै गएको देखिएको छ । फेब्रुअरीमा सुमात्रा टापुमा अभियन्ता मोहम्मद रोसिदीमाथि मोटरसाइकलमा आएका दुई व्यक्तिले कारको झ्यालबाट एसिड फ्याँकेपछि उहाँ गम्भीर रूपमा घाइते भएका थिए ।
एसिडले उहाँका हात, खुट्टा र शरीरका विभिन्न भागमा जलन र चोट पुर्याएको थियो । उहाँका अनुसार आक्रमण निकै पीडादायी थियो र उहाँ तत्कालै एसिड भएको बुझिसकेका थिए । उहाँले यो आक्रमण अवैध खानी र तस्करी विरुद्धको आफ्नो अभियानसँग सम्बन्धित हुन सक्ने आशङ्का गरेका छन्, तर अहिलेसम्म कुनै पक्राउ भएको छैन । यस्तै, राजधानी जाकार्तामा मानव अधिकार अभियन्ता आन्द्रिए युनुसमाथि पनि स्कुटरमा आएका व्यक्तिले एसिड फ्याँकेका थिए, जसका कारण उनको एक आँखाको दृष्टि गुम्ने खतरा रहेको छ ।
मानव अधिकार संस्थाले इन्डोनेसियामा सरकारको आलोचना गर्ने व्यक्तिमाथि दबाब र हिंसा बढ्दै गएको बताएका छन् । अभियन्ता, पत्रकार र नागरिक समाजका व्यक्ति धम्की र आक्रमणको जोखिममा परेको रिपोर्ट सार्वजनिक भएको छ । सरकारी पक्षले आलोचनालाई स्वीकार गर्ने र अभिव्यक्ति स्वतन्त्रता कायम रहेको दाबी गरेको जनाएको छ । तर अधिकारकर्मीका अनुसार एसिड आक्रमण जस्ता घटना डर फैलाउन र आलोचकलाई चुप गराउने उद्देश्यले गरिएका हुन् । घाइते अभियन्ताले कडा सुरक्षा चुनौतीका बाबजुद पनि आफ्नो अभियान जारी राख्ने बताएका छन् । रासस/एएफपी
