भारतको दिल्लीबाट मुक्तिनाथ अब ३० घण्टामै

अमृतप्रसाद पौडेल 

म्याग्दी, माघ २१ गते ।विश्वकै अग्लो स्थानमा रहेको भगवान विष्णुको मन्दिर मुक्तिनाथ धामको दर्शन गर्नका लागि भारतको नयाँदिल्लीबाट अब ३० घण्टामै पुगिने भएको छ । 

म्याग्दीको सदरमुकाम बेनीबाट सिधै बस सेवामार्फत भारतको नयाँ दिल्ली सेवा सुरु भए पछि मुक्तिनाथका लागि सहज भएको हो । बुधबारदेखि मोडर्न इरा टुर्स एन्ड ट्राभल्स र सृष्टि यातायात प्रालिले हरेक दिन बिहान ६ः४५ बजेदेखि बेनी कालिपुलबाट बस मार्फत सेवा दिने छ ।

बेनीदेखि छुटेको बस स्याङ्जा वालिङ, भैरहवा, अयोध्या, आग्रा हुँदै नयाँ दिल्लीसम्म पुग्ने छ ।नयाँदिल्ली देखि बेनी २७ घण्टा र बेनी देखि मुक्तिनाथ पुग्न ३ घण्टा लाग्ने भएकोले भारतीय पर्यटकहरूलाई दिल्लीदेखि मुक्तिनाथ पुग्न सहजता भएको हो ।

बेनी नगरपालिका–८, कालीपुल बसपार्कबाट बेनी नगर प्रमुख सुरत केसीले बस सेवाको शुभारम्भ गर्नुभएको छ । बस सेवा शुभारम्भ गर्दै नगर प्रमुख केसीले जिल्लाको धार्मिक तथा पर्यटन क्षेत्रलाई समेत टेवा पुर्‍याउने विश्वास गरिएको धारणा राख्नुभएको थियो ।

 म्याग्दीमा रहेका धार्मिक पर्यटकीय स्थलहरू गलेश्वरधाम, पुलहआश्रमका साथै मुस्ताङको मुक्तिनाथ र दामोदर कुण्ड दर्शनका लागि आउने भारतीय हिन्दु पर्यटकलाई यस सेवाबाट सहज हुने भएकाले प्रचारप्रसारमा सघाउने प्रमुख केसीको भनाइ छ ।

 बेनी नगरकी उपप्रमुख ज्योति लामिछाने, वडाध्यक्ष उत्तमकुमार कर्माचार्य, म्याग्दी उद्योग वाणिज्य सङ्घका वरिष्ठ उपाध्यक्ष राजेश शाक्य, धौलागिरि गण्डकी यातायात प्रालिका अध्यक्ष उमेश केसी लगायतको उपस्थिति रहेको थियो । 

म्याग्दीबाट सिधै भारत जाने पहिलो यात्रु मङ्गला गाउँपालिका-१, भर्जुलाका उमेश किसानलाई आगामी दिन यात्रा गर्नु पर्दा हरेक यात्रामा २० प्रतिशत छुट दिने यातायात कम्पनीले जनाएको छ ।

 बेनीबाट नयाँ दिल्लीसम्मको प्रतियात्रु शुल्क पाँच हजार चार सय रुपियाँ र नयाँ दिल्लीबाट तीन हजार दुई सय भारु भाडादर निर्धारण गरिएको सृष्टि यातायात प्रालिका अध्यक्ष कृष्णप्रसाद पौडेलले जानकारी दिनुभयो । 

बेनी नगरपालिकाका प्रमुख केसीले म्याग्दी तथा मुस्ताङको धार्मिकस्थललाई भारतसँग जोड्न, भारतीय पर्यटकलाई समेत भित्र्याउन भारतमा गर्ने प्रचारप्रसारमा आफूहरूले पनि सहयोग गर्ने बताउनुभयो ।

 बस सेवाका लागि भारतबाट बेनी आउनेलाई भारतको सरोजनी नगरबाट हरेक दिन साँझ ४ बजे छुट्ने छ । आधुनिक सुविधा रहेको बसमा यात्रा गर्ने क्रममा भारतका विभिन्न धार्मिक सहरको समेत अवलोकन गर्न सकिन्छ ।

 छिमेकी जिल्ला मुस्ताङको मुक्तिनाथ मन्दिरम वार्षिक एक लाखभन्दा बढी भारतीय दर्शनका लागि आउने गरेका छन् ।म्याग्दीबाट भारत जान यस अगाडि पोखराबाट बस सेवा प्रयोग गर्नुपर्ने बाध्यता थियो । म्याग्दीबाट २७ घन्टामा दिल्ली पुग्न सकिन्छ । बेनी–दिल्लीको दुरी १४ सय किलोमिटर छ ।