दुवै पक्ष निर्वाचन आयोगमा

काठमाडौँ, माघ १ गते ।  नेपाली कांग्रेसको संस्थापन पक्ष र विशेष महाधिवेशन आयोजक समितिले आआफ्ना निर्णयबारे निर्वाचन आयोगलाई जानकारी गराएका छन् । कांग्रेस केन्द्रीय कार्यालय सानेपामा बुधबार बसेको केन्द्रीय कार्यसमिति बैठकले महामन्त्रीद्वय गगनकुमार थापा र विश्वप्रकाश शर्मा तथा सहमहामन्त्री फरमुल्लाह मन्सुरलाई कारबाही गरिएको विषय निर्वाचन आयोगलाई जानकारी गराएको हो । 

कांग्रेस मुख्य सचिव कृष्णप्रसाद पौडेलले पार्टीका महामन्त्रीद्वय थापा र शर्मा तथा सहमहामन्त्री मन्सुरलाई केन्द्रीय कार्यसमिति बैठकबाट कारबाही गरिएको बुधबारै निर्वाचन आयोगलाई जानकारी गराइएको बताउनुभयो । त्यसै गरी कांग्रेसको विशेष महाधिवेशन आयोजक समितिले पुस २७ गतेदेखि काठमाडौँको भृकुटीमण्डपमा विशेष महाधिवेशन आह्वान गरिएको लिखित जानकारी निर्वाचन आयोगलाई दिएको हो । निर्वाचन आयोगका प्रवक्ता नारायणप्रसाद भट्टराईले कांग्रेसको विशेष महाधिवेशनबारे आयोग जानकार रहेको पुष्टि गर्नुभयो । त्यसै गरी कांग्रेसको विशेष महाधिवेशन समितिले विशेष महाधिवेशन, कार्यविधि पारित गरिएको र नयाँ नेतृत्व चयन गर्नेबारे लिखित निवेदनमार्फत जानकारी गराएको पुष्टि गरेको छ । 

विशेष महाधिवेशनबाट नयाँ नेतृत्व 

नेपाली कांग्रेसको दोस्रो विशेष महाधिवेशनले नयाँ नेतृत्व चयनका लागि निर्वाचन प्रव्रिmया अघि बढाएको छ । विशेष महाधिवेशनको बुधबारको बन्दसत्रमा पार्टीका महामन्त्री गगनकुमार थापालाई सर्वसम्मत रूपमा सभापति चयनको घोषणा गरिएको छ भने केन्द्रीय उपसभापतिमा विश्वप्रकाश शर्मा र पुष्पा भुसाल, महामन्त्रीमा प्रदीप पौडेल र गुरुराज घिमिरे, सहमहामन्त्रीमा डा. डिला सङ्ग्रौला, प्रकाश रसाइली, बहादुर सिंह लामा, उदयशमशेर राणा, मुक्ताकुमारी यादव, फरमुल्ला मन्सुर, योगेन्द्र चौधरी, कर्णबहादुर बुढा चयन हुनुभएको छ । साथै, केन्द्रीय सदस्यमा गोपालमान श्रेष्ठ, अर्जुननरसिंह केसी, ओमकारप्रसाद श्रेष्ठलगायत १२१ जना चयन भएका छन् । 

महामन्त्रीद्वय थापा र शर्मालाई कारबाही 

कांग्रेस केन्द्रीय कार्यसमिति बैठकले अनुशासन उल्लङ्घन गरेको निष्कर्षसहित आजका मितिबाट लागु हुने गरी पार्टीबाट पाँच वर्षका लागि निष्काशन गरिएको छ । कांग्रेस केन्द्रीय सदस्य एवं सूचना सञ्चार तथा प्रचार विभाग प्रमुख मीनबहादुर विश्वकर्माले विशेष महाधिवेशन आयोजना गरी पार्टीलाई गम्भीर हानिनोक्सानी पु¥याउने कार्यमा संलग्न भएको ठहर गर्दै महामन्त्री गगनकुमार थापा, महामन्त्री विश्वप्रकाश शर्मा र सहमहामन्त्री फरमुल्लाह मन्सुरलाई कारबाही गरिएको बताउनुभयो । 

उहाँले विशेष महाधिवेशनमा सहभागी नहुन र भएका नेता कार्यकर्तालाई पनि यथाशीघ्र पार्टीको जिम्मेवारीमा फर्किएर घोषित १५ औँ महाधिवेशनका कार्यव्रmम सफल पार्न तथा फागुन २१ गतेको प्रतिनिधि सभाको निर्वाचनमा पार्टीलाई बहुमत दिलाउने कार्यमा निरन्तर सक्रिय रहन आह्वान गर्ने निर्णय भएको बताउनुभयो । 

उहाँले पुस २९ गते कांग्रेसको विशेष केन्द्रीय महाधिवेशन कार्यविधि २०८२ पारित, महामन्त्रीद्वय थापा र शर्माको प्रतिवेदनसमेत पेस गरी छलफल भई पारित गरेको, निर्वाचन समिति गठन गरी निर्वाचन कार्यक्रमको तालिका प्रकाशन गरेको र बुधबार महामन्त्रीमा रहेका पदाधिकारीले पार्टीको सभापतिमा र अन्य पदाधिकारी तथा केन्द्रीय सदस्यले विभिन्न पदमा उम्मेदवार भई दरखास्त दिएको जस्ता पार्टी विधानविपरीतका कार्य गरेको बताउनुभयो । उहाँले भन्नुभयो, “१४ औँ महाधिवेशनबाट निर्वाचन सभापति शेरबहादुर देउवा नेतृत्वको केन्द्रीय कार्यसमिति नै वैधानिक हो । यसमा छलफल गरिरहनु परेन ।”

‘केन्द्रीय समिति भङ्ग भइसक्यो’

विशेष महाधिवेशन आयोजनापछि कारबाहीमा गरेका महामन्त्रीद्वय गगनकुमार थापा र विश्वप्रकाश शर्माले विशेष महाधिवेशनले १४ औँ महाधिवेशनमार्फत निर्वाचित केन्द्रीय कार्यसमिति विघटन गरिसकेकाले कारबाहीको निर्णयको अर्थ नहुने बताउनुभएको छ । महामन्त्री थापाले संविधान, कानुन र नेपाली कांग्रेसको विधान अनुसार विशेष महाधिवेशनले आधिकारिकता प्राप्त गर्ने, पार्टीको झन्डा र रुख निर्वाचन चिह्न पनि विशेष महाधिवेशनबाट निर्वाचन कार्यसमितिले प्राप्त गर्ने बताउनुभयो । 

उहाँले जेनजी आन्दोलनपछि उत्पन्न विशिष्ट परिस्थितिकै कारण विशेष अधिवेशन आयोजना गरिएको प्रस्ट पार्नुभयो । उहाँले ७७ वटै जिल्लाबाट आएका महाधिवेशन प्रतिनिधिलाई विशेष महाधिवेशनमा सहभागी हुँदा शिर निहु-याउनु नपर्ने र पार्टी विभाजित पनि नहुने बताउनुभयो । उहाँले कांग्रेस पार्टीलाई रूपान्तरण गर्नकै लागि विशेष महाधिवेशन आयोजना गरिएको बताउनुभयो । महामन्त्री शर्माले संविधान र कांग्रेसको विधानका आधारमा निर्वाचन आयोगसमेतले पार्टीका विशेष महाधिवेशनलाई वैधानिकता प्रदान गर्ने बताउनुभयो । उहाँले महामन्त्री शर्माले १५ औँ महाधिवेशनसम्मका लागि विशेष महाधिवेशनबाट निर्वाचित नेतृत्वले काम गर्ने, फागुन २१ गतेको निर्वाचनमा कांग्रेसलाई विजयी गराउन देशैभरि लाग्ने र पार्टीलाई रूपान्तरणको नवीन अध्यायतर्फ अघि बढाउने उद्घोष गर्नुभयो । उहाँले विशेष महाधिवेशनबाट पारित भएका सबै विषय पार्टी र देशको हितमा रहेको प्रस्ट पार्दै विशेष महाधिवेशनसँगै देशभरि कांग्रेसको पक्षमा माहोल सिर्जना हुने बताउनुभयो । सहमहामन्त्री फरमुल्लाह मन्सुरले विशेष महाधिवेशनमार्फत पार्टीमा रूपान्तरणमा नयाँ युग सुरु भएको बताउनुभयो । उहाँले अब पार्टी चलायमान हुने विश्वास व्यक्त गर्नुभयो । 

सघन विमर्श, आएन निष्कर्ष 

नेपाली कांग्रेसको दोस्रो विशेष महाधिवेशन आयोजनापछि उत्पन्न परिस्थितिको निकासका लागि बुधबार पनि संवाद भयो । सभापति शेरबहादुर देउवासँग महामन्त्रीद्वय गगनकुमार थापा र विश्वप्रकाश शर्माको संवादले पनि सहमति जुट्न सकेन । विशेष महाधिवेशनलाई सुरक्षित र सहमतिका साथ समापन गर्ने गरी सभापति देउवा पक्ष, महामन्त्रीद्वय थापा र शर्मा नेतृत्वको विशेष महाधिवेशन पक्ष र नेता डा. शेखर कोइराला पक्षबिच त्रिपक्षीय संवाद बुधबारसम्मै चल्यो । संस्थापनका तर्फबाट नेताहरू बालकृष्ण खाण र रमेश लेखक, विशेष महाधिवेशन आयोजक समितिका तर्फबाट नेताहरू देवराज घिमिरे, मधु आचार्य, गुरुराज घिमिरे र प्रदीप पौडेल, डा. कोइरालाका तर्फबाट सहमहामन्त्री जीवन परियार र नेता डा. मिनेन्द्र रिजालबिचको संवाद पटक पटक भए पनि निकास आएन ।