देशमा सकारात्मक परिवर्तनको खाँचो छ : अध्यक्ष ओली

गोरखापत्र अनलाइन

काठमाडौँ, कात्तिक १ गते । नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले देशमा सकारात्मक परिवर्तन हुनु अनिवार्य रहे पनि भत्काउने र विध्वंस गर्ने परिवर्तन देशलाई नचाहिएको बताउनुभएको छ । 

पार्टी मुख्यालय च्यासल ललितपुरमा आज आयोजित कार्यक्रममा उहाँले त्यस्तो बताउँदै भौतिक संरचना, तोडफोड गरेर देशको विकास कहिल्यै सम्भव नहुने बताउनुभयो । नेपाली जनताले ठुलो सङ्घर्ष र बलिदान दिएर देशमा लोकतन्त्र ल्याएको चर्चा गर्नुहुँदै अध्यक्ष ओलीले भन्नुभयो, “अर्काको घरमा आगो लगाउने, सरकारी भौतिक संरचना ध्वस्त गर्ने, सामाजिक सञ्जालमा अस्वस्थता र गलत भास्य सिर्जना गर्नुले मुलुकमा शान्ति र विकास हुँदैन ।”

अहिलेको सरकारले मुलुकमा चुनाव गराउने गरी अन्तरिम सरकार गठन भए पनि निर्वाचनमा ध्यान दिन नसकेको भन्दै उहाँले देशको विकासमा यो सरकारले काम गर्न नसक्ने बताउनुभयो । मुलुकमा शान्ति कायम गर्न र दिगो विकास गर्नका लागि एमालेजस्तो पार्टी रहेको बताउँदै उहाँले केही समयपछि राजनीतिक वातावरण सङ्लिने विश्वास व्यक्त गर्नुभयो । 

लोकतान्त्रिक प्रणाली सबैले मान्न अनिवार्य रहेको भन्दै उहाँले संविधानले त्यही व्यवस्थाको अङ्गिकार गरेको बताउनुभयो । कानुनी प्रक्रिया पूरा गरी शान्तिपूर्ण रूपमा आयोजना हुने निर्वाचनबाट एमाले नभाग्ने तर अस्वस्थ र गैरकानुनी रूपमा आयोजना हुने निर्वाचन सफल नहुने उहाँको भनाइ छ । मुलुकमा कानुनी राज र प्रणालीको विकास गर्न अपरिहार्य रहेको भन्दै उहाँले मुलुकलाई अस्थिर राख्ने छुट कसैलाई नभएको बताउनुभयो । 

कानुनी र राजनीतिक रिक्तताले मुलुक चल्न नसक्ने भन्दै अध्यक्ष ओलीले भन्नुभयो, “व्यक्तिगत रिसइबी गरेर मुलुकमा शान्ति आउँदैन, मसहित नेताहरुलाई पक्राउ गर्ने भनिएको छ, के कारण देखाएर पक्राउ गर्ने ? आधार त चाहिएला नि पक्राउ गर्ने ? सम्पत्ति छानबिन गर्ने भनिएको छ, गर्नुस् छानबिन । निष्पक्ष छानबिन गर्नुस् ।”

जेनजी युवाको टाउकोमा आरोप थुपारेर परिवर्तन तुहाउने प्रयास भइरहेको बताउँदै अध्यक्ष ओलीले भन्नुभयो, “व्यक्तिको घर जलाउन जेनजी गएका होइनन्, सार्वजनिक भौतिक संरचना जलाउन र तोडफोड गर्न जेनजी गएको होइन । जेनजीको आवरणमा आपराधिक गिरोहले सबै गलत काम गरेको हो । त्यसको उचित छानबिन हुनुपर्छ ।”

समय गतिशील भएकाले सबैले हेक्का राख्नुपर्ने भन्दै अध्यक्ष ओलीले आज गल्ती गर्नेहरू भोलि कठघरामा आउनुपर्छ भन्ने ख्याल गर्नुपर्छ उहाँले सुझाव दिनुभयो । देश र जनताको पक्षमा काम गर्नेको जहिले सही मूल्याङ्कन हुने तर गलत काम गर्नेको ढिलोचाँडो पहिचान हुने उहाँले बताउनुभयो । 

जेनजी आन्दोलनपछि पहिलो पटक पार्टी मुख्यालय च्यासलमा पुगेर धारणा राख्दै अध्यक्ष ओलीले सरकारको तर्फबाट जेनजीमाथि गोली चलाउने निर्देशन नदिइएको पुनः दोहोर्‍याउनुभयो । घटनाको निश्पक्ष छानबिन गर्न उहाँले माग गर्नुभयो । अध्यक्ष अ‍ोलीले पार्टी मुख्यालयको क्षति भएको संरचनाको अवलोकन गर्नुभएको छ ।