निशा राई
धरान, मङ्सिर १४ गते । ऊर्जा, जलस्रोत तथा सिँचाई, भौतिक पूर्वाधार तथा यातायात र सहरी विकास मन्त्री कुलमान घिसिङले देश बन्नलाई सहि नेतृत्व हुन जरुरी रहेको बताउनुभयो ।
आइतबार धरान उप–महानगरपालिका–१५ स्थित रहेको ङाग्युर ञीङ्गा ङ्युङने ल्हाखाङ गुम्बाले १२०० प्राचीन (गुरु छेन्गे) गुरु रिन्पोछे लिला, दश करोड बज्र गुरु जप तथा विश्व शान्ति पूजामा सहभागी भई सम्बोधन गर्ने क्रममा उहाँले उक्त कुरा बताउनु भएको हो ।
उहाँले हामीसँग समृद्धिका लागि सबै कुरा छ, त्यसका लागि ‘हुमन क्यापिटल’को प्रयोग गर्न जान्नुप¥योे, हामीले जति टेक्निकल चलाउन जान्यो त्यति नै छिटो देश अगाडि बढ्ने बताउनुभयो ।
जलविद्युतको कुल क्षमता करिब ८३ हजार मेघावाटको छ । हामीले विगतमा ५ सय मेघावाट मात्र प्रयोग गरिहरेका थियौं, तर ८ वर्षमा चार हजार मेघावाट बनाएका छौं । अहिले १० हजार मेघावाट उत्पादन गरिरहेका छौं, करिब १५ सय मेघावाट भारत र बंगलादेशमा निर्यात गर्ने तयारी भइरहेको छ । हाईड्रो पावर मात्र होइन टुरिजमको सम्भावना र अन्य थुप्रै सम्भावना नेपालमा रहेको मन्त्री घिसिङले बताउनुभयो ।
‘‘उज्यालो नेपाल भन्ने बितिकै बत्तीको उज्यालो मात्र होइन, बत्तीको उज्यालो क्षणिक हो । अहिले हाम्रो मन मस्तिष्कको उज्यालो धेरै महत्वपूर्ण रहेको उहाँले बताउनुभयो । नेपाल उज्यालो हुनका लागि नेपाल समृद्धको उज्यालो हुनुपर्छ, विकास निर्माण हुनुपर्छ, भ्रष्टाचार मुक्त हुनुपर्छ, सामाजिक न्याय हुनुपर्छ, देशमा भएको हरेक अँध्यारोलाई उज्यालोमा परिणत गर्नुसक्नुपर्छ, स्वास्थ्य शिक्षा रोजगारीका साथै गरिबी हट्नुपर्छ, अनि मात्र देश उज्यालो हुन्छ, जसका लागि देशमा शिक्षाको उज्यालो एकदमै जरुरी छ’’ मन्त्री घिसिङले बताउनुभयो ।
राजनीतिक परिवर्तनले मात्र देश बन्दैन रहेनछ भन्ने करिब ७५ वर्ष लामो राजनीतिक यात्राले देखाएको छ । जबसम्म देशलाई चाहिने प्रधानमन्त्री सहि हुँदैन तब देश बन्दैन त्यसैले सहि समयमा सहि मान्छे हुन जरुरी रहेको उहाँले बताउनुभयो ।
निर्वाचनको सन्दर्भमा उहाँले भन्नुभयो, ‘‘सहि समयमा सहि व्यक्तिले देश नचलाउँदा देश बिग्रिएको छ, अब आउने सरकार कस्तो हुन्छ, आफैँले सोच्नुहोला र सहि नेतृत्व छान्नु होला । देश बनाउनलाई सहि व्यक्ति चुन्न जरुरी रहेको छ । त्यसका लागि सहि नेतृत्व छान्नुपर्छ जुन जनताकै जिम्मामा रहेको छ ।’’
उज्यालो नेपाल भनेको समग्रमा देशलाई उज्यालो बनाउने हो र यहि अभियानलाई लिएर अघि बढ्छ । देशलाई समृद्ध बनाउने उद्देश्य हो । गरिबी, रोजगारी दिने उज्यालो, सुशासनको उज्यालो हो । उज्यालो नेपालले यसैलाई साथ लिएर हिँडेको उहाँले बताउनुभयो ।
विश्व शान्तिका लागि प्रत्येक वर्ष यस गुम्बाले पुजा गर्दै आएको गुम्बाका अध्यक्ष लोकबहादुर तामाङले बताउनुभयो । यस बर्ष अवतारी लामाहरुको विशेष उपस्थितिमा विश्व शान्तिका लागि गत ९ गतेबाट सुरु गरी मंसिर १९ गतेसम्म गरिने अध्यक्ष तामाङले बताउनुभयो ।
