काठमाडौँ, मङ्सिर १४ गते। नेकपा (एमाले)का अध्यक्ष केपी शर्मा ओलीले ११ औं महाधिवेशनमा प्रतिस्पर्धा खुला रहेको तर सहमतिबाट नेतृत्व चयनको प्रयास रहने बताउनुभएको छ।
एमालेको महाधिवेशन प्रचार समितिले आइतबार पार्टी केन्द्रीय कार्यालयमा आयोजना गरेको ११ औं राष्ट्रिय महाधिवेशनको प्रतिक चिह्न (लोगो) सार्वजनिकीकरण कार्यक्रममा उहाँले सो कुरा बताउनुभएको हो। उहाँले कमिटीमा स्वभाविक रुपमा नेतृत्व पुर्नगठन एवम् पुस्तान्तरण हुने भनाइ समेत राख्नुभयो।
अध्यक्ष ओलीले भन्नुभयो, “अधिवेशन हुँदा कमिटीमा स्वभाविक रुपमा केही परिवर्तन, केही हेरफेर, केही साथी हट्ने, केही नयाँ आउने यो शिलशिला हुन्छ। त्यसमा पुर्नगठन हुनुपर्छ, परिवर्तन हस्तान्तरण, पुस्तान्तरण हुनुपर्छ भनेर यस्तो जोडदार रुपले भनिरहनुपर्ने विषय होइन। हस्तान्तरण र पुस्तान्तरण आवश्यकता अनुसार हुन्छ नै। अधिवेशन त्यसैकारण चाहियो नै।”
उहाँले महाधिवेशनमा कसैलाई रोक्ने कुरा नहुने र खुला प्रतिस्पर्धा हुने बताउनुभयो।]
उहाँले भन्नुभयो, “महाधिवेशनमा मतदान हुन्छ। कसैले मतदान गर्न नदिएर मतदान नै नभएर सर्वसम्मति गर्नुपर्छ भन्ने नाममा सेन्टिमेन्टल कुरा गरेर, कसैलाई अगाडि बढ्नै नदिएर रोक्ने कुरा छ कि भन्ने हुँदैन। प्रतिस्पर्धा खुला हुन्छ। प्रतिस्पर्धा गर्न चाहनेले प्रतिस्पर्धा राम्रोसँग गर्न पाउँछ। त्यसका लागि ठाउँ खुला हुन्छ।”
यद्दपि, अध्यक्षको हैसियतले आफ्नो तर्फबाट सहमतिको आग्रह भने रहने उहाँको भनाइ छ।
उहाँले भन्नुभयो, “तर, मेरो अध्यक्षको हैसियतले के आग्रह हुन्छ भने जसले छोड्नुुपर्छ सहमतिसाथ छोडौँ। जो बस्नुपर्छ, सहमतिका साथ बसौं। सहमतिका साथ गरौँ, सहमतिका साथ जाऔं। भन्दै गर्छन् एमालेमा डेमोक्रेसी नै छैन। चुनावै लडेन। कसैलाई चुनाव लड्न दिइएन। नदिइएको होइन, मेरो आग्रह छ। एकताबद्ध भएर जाऔं। एकअर्कामा टीकाटिप्पणी गर्ने, होच्याउने, अपमान गर्ने जस्ता कामहरु किन गर्ने ? र परस्पर सम्मानको कल्चर सम्मानपूर्वक ढङ्गले चल्नुपर्छ।”
अध्यक्ष ओलीले मुलुकमा अन्यौलता, अशान्ति फर्किन नदिन हासिल भएका उपलब्धि जोगाउनुपर्ने धारणा राख्नुभयो।
उहाँले भन्नुभयो, “बढो मुस्किलले यो उपलब्धि हासिल गरेका छौं, यो उपलब्धि जोगाऔं। यसपल्ट पनि एउटा अनियन्त्रित आग्रह, राष्ट्रिय स्तरमा लुटपाट, अब फेरिक मुलुकलाई अन्यौलता, अराजकता, अशान्ति यतै फर्किन दिनु हुँदैन। लोकतन्त्रतिर फर्कनु बाहेक अर्को विकल्प छैन।”
कार्यक्रमका संयोजक नेतृ पद्मा अर्यालले ११ औँ महाधिवेशनको केबल चिह्न र लोगो मात्रै सार्वजनिक नभएको यसले एकताको सन्देश प्रवाह गर्न खोजेको बताउनुभयो। महाधिवेशनको प्रचारप्रसारलाई आगामी दिनमा थप तीव्र बनाइने उहाँको भनाइ छ।
कार्यक्रममा एमाले वरिष्ठ उपाध्यक्ष ईश्वर पोखरेल, उपाध्यक्ष युवराज ज्ञवाली, अष्टलक्ष्मी शाक्य, रामबहादुर थापा, विष्णुप्रसाद पौडेल, सुरेन्द्रप्रसाद पाण्डे, गुरुप्रसाद बराल, महासचिव शंकर पोखरेल, उपमहासचिव पृथ्वीसुब्बा गुरुङ, विष्णुप्रसाद रिमाल, सचिव योगेश भट्टराई लगायतका नेता उपस्थित हुनुभएको थियो।
उहाँ राजनीति र समसामयिक विषयमा रिपोर्टिङ गर्नुहुन्छ ।
