कमल खत्री
धम्बोझी, असोज २८ गते । जलवायु परिवर्तनको विश्वव्यापी मुद्दालाई स्थानीय तहमा जागरण फैलाउने उद्देश्यले आयोजित गौघाट ग्रीन रनको उपाधि युवकराज बुढा र दीपशीखा शाहीले जित्नु भएको छ ।
एघार वर्षदेखि नियमित आयोजना हुँदै आएको धारा नेपालगन्ज म्याराथनको भगिनी इभेन्टका रुपमा गत बर्षदेखि सुरु भएको गौघाट ग्रीन रनमा कर्णाली जुम्लाका युवकराज र बाँके कोहलपुरकी दीपशीखा च्याम्पियन बन्नुभएको हो ।
खजुरा पालिकाको सितापुरमा भएको पाँच किलोमिटर खुला पुरुषतर्फ नरैनापुरका अरविन्दकुमार यादव दोस्रो र जुम्लाका यमराज खत्री तृतीय हुनुभयो । खुला छात्रा २.५ किमीमा कोहलपुरकी दीपशीखा प्रथम हुँदा, कोहलपुरकी स्वस्तिका शाही र बर्दियाकी राधा सुनार तृतीय हुनुभयो ।
खजुरा पालिका स्तरीय पाँच किलोमिटर छात्रतर्फ ज्ञानोदय उच्च माविका धनिराम खटिक प्रथम, जनता उच्च माविका निकेस खत्री दोस्रो र अमर माविका युसुफ विक तृतीय हुनुभएको थियो ।
यसैगरी छात्रा २.५ किमीमा अमर माविकी विनिसा एलजी पहिलो, योगिनी माविकी प्रशंसा विसी दोस्रो र अमर माविकी विनिता पुलामी तेस्रो हुनुभयो ।
विजयी खेलाडीलाई खजुरा गाउँपालिका अध्यक्ष डम्बर विक तुफान, लुम्बिनी प्रदेश खेलकुद परिषदका सदस्य सचिव तिरन गौतम, मिस नेपाल वल्र्ड २०२३ श्रृच्छा प्रधान, केएल दुगड ग्रुपका सिईओ प्रदीप छाजेड, वडाअध्यक्ष धनराम ओली, वल्र्ड क्लास धावक केन्याका जोन केलाईले नगद तथा पदक वितरण गर्नुभयो ।
कार्यक्रममा धारा नेपालगन्ज म्याराथनका सदभावना दुत मिस नेपाल वल्र्ड २०२३ श्रृच्छा प्रधानले प्रकृतिलाई पहिलो गुरु मान्नुपर्ने धारणा राख्नुभएको थियो ।
सबै मिलेर प्रकृति जोगाउन सकेमात्र मानव अस्तित्व जोगिने बताउँदै उहाँले भन्नु भयो, ‘दौडले समाजलाई जोड्छ, स्वस्थ राख्छ । आजैदेखि सबैले प्लास्टिक प्रयोगलाई निरुत्साहित गर्नतर्फ लागौं, स्वस्थ समाज निर्माण गरौँ ।’
सोमबार मात्र श्रृच्छा र कमनवेल्थ गेम्स २०१० को स्वर्ण पदक विजेता केन्याका जोनलाई धारा नेपालगन्ज म्याराथनको सद्भावना दुत नियुक्त गरिएको थियो ।
कार्यक्रममा खजुरा पालिका अध्यक्ष डम्बर विकले जागरण फैलाउने उद्देश्यले आयोजित ग्रीन रनले ठुला सेलिब्रिटी मार्फत सन्देश फैलाउन सफल भएकोमा पालिकाले सहकार्य गर्ने प्रतिबद्धता जनाउनुभयो ।
लुम्बिनी प्रदेशका सदस्य सचिव गौतमले समेत पृथक अवधारणाको दौडले समाजलाई शान्ति, एकता र सदभावको मालामा जोड्ने बताउनुभयो ।
विश्व रनिङको साझा संस्था एसोसियसन अफ इन्टरनेसनल म्याराथन एन्ड डिस्टेन्स रेस (एम्स) बाट प्रमाणीकरण रुट भएको धारा नेपालगन्ज म्याराथनको ११औं संस्करण यही मङ्सिर ६ गते शनिबार हुने छ ।
यसको लागि दर्ता खुला गरिसकेको आयोजक संस्था क्रियटिभ ह्यान्ड्सका प्रमुख टिएस ठकुरीले बताउनुभयो ।
