अमरराज नहर्की
तनहुँ, असोज २७ गते । जेनजी आन्दोलनको क्रममा क्षतिग्रस्त भएको जिल्ला प्रशासन कार्यालय तनहुँको सेवा पुनः सुचारु गर्न तनहुँ उद्योग वाणिज्य संघले सहयोग गरेको छ ।
सेवा अवरुद्ध हुँदा सर्वसाधारणलाई परेको कठिनाइलाई मध्यनजर गर्दै संघले दुई लाख २० हजार रुपियाँ खर्च गरेर कार्यालयका दुई वटा कोठाको मर्मत–सम्भार गरेको हो । संघका अध्यक्ष वैकुण्ठनाथ मिश्रका अनुसार चाडपर्वको व्यस्त समय र रातको समयमा समेत काम गरेर मर्मत कार्य शीघ्र सम्पन्न गरिएको हो । मिश्रले भन्नुभयो, “जनताले तुरुन्त सेवा पाउन सकुन् भन्ने उद्देश्यले काम निरन्तर अघि बढाइयो ।”
मर्मत सम्पन्न भएपछि आइतबारदेखि राष्ट्रिय परिचयपत्र सेवा पुनः सुरु गरिएको जिल्ला प्रशासन कार्यालय तनहुँका प्रमुख जिल्ला अधिकारी रामकृष्ण अधिकारीले जानकारी दिनुभयो । उहाँका अनुसार राहदानी वितरणका विवरण सङ्कलन कार्य पनि चाँडै सुरु हुने तयारी भइरहेको छ भने नागरिकतासम्बन्धी सेवा भने यसअघि नै सञ्चालनमा आइसकेको छ ।
कार्यालय क्षतिग्रस्त भएपछि पाँच युनिटमा सञ्चालन हुने काम अहिले अस्थायी रूपमा दुई युनिटबाट सञ्चालन गरिएको छ । “नेपाल सरकारले दुई युनिटका लागि उपकरण पठाएकोले राष्ट्रिय परिचयपत्र सेवा सुरु गरिएको हो,” प्रजिअ अधिकारीले बताउनुभयो ।
संघको सहयोगका कारण सेवा छिटो सुरु गर्न सहज भएको उहाँको भनाइ छ । मर्मत सम्पन्न दुई कोठाको चाबी हस्तान्तरण कार्यक्रम आइतबार सम्पन्न भएको थियो । चाबी संघका अध्यक्ष वैकुण्ठनाथ मिश्रले प्रजिअ अधिकारीलाई हस्तान्तरण गर्नुभएको हो । उक्त अवसरमा सङ्घका पूर्व अध्यक्षहरू वृषराज श्रेष्ठ, मङ्गलप्रसाद श्रेष्ठ, पविन्द्रकुमार श्रेष्ठ, दमौली बजार इकाइका सभापति सुकनारायण मल्ल, निवर्तमान सभापति भूपाल आलेलगायतको उपस्थिति रहेको थियो ।
