फडिन्द्र अधिकारी
लेखनाथ, असोज २१ गते । पोखराको सहिदचोकमा रहेको गण्डकी प्रदेशका मुख्यमन्त्री निवासमा आगजनी गरेको अभियोगमा एक युवकलाई प्रहरीले पक्राउ गरेको छ ।
रूपन्देहीको तिलोत्तमा नगरपालिका–४ घर भई पोखरा महानगरपालिका–७, राष्ट्र बैँक चोक बस्दैआएका २२ वर्षीय सञ्जोक थापालाई सोमबार प्रहरीले पक्राउ गरेको हो ।
भदौ २४ गते आगजनी हुँदा बाँकी रहेका कागजपत्र जलाउन थापाले असोज १२ गते राति फेरि आगजनी गरेको जिल्ला प्रहरी कार्यालय कास्कीका प्रहरी नायब उपरीक्षक हरिबहादुर बस्नेतले जानकारी दिनुभयो ।
प्रहरीले थापालाई नियन्त्रणमा लिएर थप अनुसन्धान अघि बढाएको बस्नेतले जानकारी दिनुभयो । अनुसन्धानका क्रममा थापाले पोखरा–७ स्थित नेपाल राष्ट्र बैँकको कम्पाउन्ड बाहिर रहेको एनआइएमबी बैँकको एटिएम मेसिनसमेत तोडफोड गरेको खुलेको छ ।
