गोरखापत्र समाचारदाता
काठमाडौँ, असोज १९ गते । नेपालकी एरिका गुरुङले शुक्रबार कराँते वान सिरिज ‘ए’ मा स्वर्ण पदक जित्नुभएको छ । मलेसियाको क्वालालम्पुरमा भएको प्रतियोगिता अन्तर्गत ६८ केजीमाथिको स्पर्धाको फाइनलमा एरिकाले ट्युनिसियाकी तेस्निम मास्कनीलाई २–० हराउनुभयो । यसअघि उहाँले प्रिक्वाटरफाइनलमा पोर्चुगलकी लोरेनजो हेलना, क्वाटरफाइनलमा जर्मनीकी रोहलमान चार्लोट र सेमिफाइनलमा चेक गणतन्त्रकी हकोभा अमाल्जीलाई पराजित गर्नुभएको थियो ।
एरिकाले कुशल श्रेष्ठको प्रशिक्षकत्वमा खेल्नुभएको हो । सो प्रतियोगितामा नेपालकी तारा गुरुङले निर्णायकको भूमिका निर्वाह गरिरहनुभएको छ । चार महिनाअघि एरिका गुरुङले विश्व कराँतेको सबैभन्दा कठिन मध्येको कराँते–१ प्रिमियर लिगमा ऐतिहासिक कांस्य पदक जित्नुभएको थियो । उहाँ १९ औँ एसियाली खेलकुदमा रजत पदक जितेर चर्चामा आउनुभएको थियो । त्यसपछि उहाँले २० औँ सिनियर एकेएफ च्याम्पियनसिपमा रजत जितेर इतिहास बनाउनुभयो ।
प्रशिक्षक श्रेष्ठले एरिकाको स्वर्ण नेपालीलाई दसैँको उपहार भन्नुभयो । यसै गरी उहाँले भन्नुभएको छ, “सपना पूरा भएको छ । अब म हामीसँग पनि विश्व विजेता कराँते खेलाडी छ भनेर भन्न सक्छु । एरिका, नेपाली कराँते र नेपाललाई बधाई छ ।”
