विनय कर्ण
कल्याणपुर (सप्तरी) असोज १४ गते । सप्तरीको छिन्नमस्ता मन्दिर परिसरमा नेपाली सेनाले निर्माण गरेको भगवान शिवको मन्दिर विधिपूर्वक उद्घाटन गरिएको छ । मध्यपूर्वी पृतनाका पृतनापति उपरथी श्री कृष्ण बहादुर जिसीले फुलपातिको अवसर पारेर सो मन्दिरको उद्घाटन गर्नुभएको हो ।
मध्यपूर्वी पृतना अन्तर्गत श्री नम्बर २७ वाहिनी तथा सम्बन्धित युनिटहरुको समन्वय र पहलमा बनेको मन्दिरको उद्घाटनसँगै सो मन्दिर सञ्चालन गर्न समितिलाई औपचारिक रुपमा हस्तान्तरण गरिएको राजविराजस्थित बरखगणका प्रमुख सेनानी सोवित बहादुर चन्दले जानकारी दिनुभयो ।
मन्दिरको उद्घाटन समारोहमा बोल्नुहुँदै वक्ताहरुले नेपाली सेनाले राष्ट्रिय सुरक्षासँगै सांस्कृतिक सम्पदाको संरक्षणमा गरेको योगदान सराहनीय भएको बताउनुभयो ।
उद्घाटन समारोहमा मध्य पूर्वी पृतनाका पृतनापति उपरथी जिसी, श्री नम्बर २७ वाहिनी अड्डाका वाहिनीपति सहायक रथी नारायण बहादुर थापा, बरख गणका गणपति प्रमुख सेनानी सोवित बहादुर चन्द, मन्दिरका पिठाधिश महाकान्त ठाकुर, छिन्नमस्ता गाउँपालिकाका अध्यक्ष विद्यानन्द चौधरी सहित स्थानीयहरुको उपस्थिती थियो ।
मन्दिरको उद्घाटन समारोहमा मन्तव्य व्यक्त गर्दै वक्ताहरूले नेपाली सेनाले राष्ट्रिय सुरक्षासँगै सांस्कृतिक सम्पदाको संरक्षणमा गरेको योगदान सराहनीय भएको बताउनुभयो । यस किसिमका पहलले सेना–जन सम्बन्ध थप मजबुत हुने उहाँहरुले विश्वास व्यक्त गर्नुभयो ।
नेपालकै प्रख्यात धार्मिक स्थलमध्ये पर्ने छिन्नमस्ता मन्दिरको ऐतिहासिक र सांस्कृतिक महत्त्वको स्मरण गर्दै वक्ताहरुले मन्दिर परिसरको संरक्षण, श्रद्धालु तथा पर्यटकमैत्री व्यवस्थापनका लागि स्थानीय तह, मन्दिर समिती र सुरक्षा निकायसँगको सहकार्यलाई निरन्तर अघि बढाउनुपर्नेमा जोड दिनुभयो ।
समारोहमा छिन्नमस्ता गाउँपालिकाको तर्फबाट अध्यक्ष चौधरीले नेपाली सेनाका पृतनापति उपरथी कृष्ण बहादुर जिसी, वाहिनीपति सहायक रथी नारायण बहादुर थापा र गणपति प्रमुख सेनानी सोवित बहादुर चन्दलाई कदरपत्र प्रदान गर्नुभयो ।
नेपाली सेनाको यस पहलले “नेपाली सेना सुरक्षा मात्र होइन, संस्कृति संरक्षण र समुदायसँग सहयात्रामा पनि समर्पित छ” भन्ने स्पष्ट सन्देश दिएको मन्दिर सञ्चालन समितिले जनाएको छ ।
