गाजा सम्झौता कायम राख्न राष्ट्रपति ट्रम्पलाई इजरायली बन्धक परिवारको आग्रह

जेरुसेलम, असोज १३ गते । गाजामा युद्ध अन्त्य गर्न तयार गरिएको प्रस्तावित सम्झौतालाई दृढतापूर्वक कायम राख्न इजरायली बन्धकका परिवारले सोमबार अमेरिकी राष्ट्रपति डोनाल्ड ट्रम्पलाई आग्रह गरेका छन् । यो अपिल प्रधानमन्त्री बेन्जामिन नेतान्याहुसँग ह्वाइट हाउसमा उहाँको भेट हुनु केही घण्टा अघि सार्वजनिक गरिएको हो ।

गाजामा बन्दी बनाइएका आफन्तको पक्षमा आवाज उठाउने संस्था होस्टेज एन्ड मिसिङ फेमिलिज फोरमले खुला पत्रमार्फत ट्रम्पलाई सम्बोधन गर्दै लेखेको छः “तपाईले अघि सारेको सम्झौतालाई तोडफोड गर्ने कुनै पनि प्रयासको विरुद्धमा दृढ रहन हामी आदरपूर्वक आग्रह गर्दछौँ । जोखिम निकै ठूलो छ, हाम्रा परिवारले यो प्रगति विफल पार्ने कुनै पनि अवरोधका लागि धेरै लामो समय प्रतीक्षा गरेका छन् ।”

गत हप्ता संयुक्त राष्ट्र महासभाको साइडलाइनमा अरब र मुस्लिम नेतासँगको छलफलपछि राष्ट्रपति ट्रम्पले प्रस्तुत गर्नु भएको २१-बुँदे योजनाले युद्धविराम सम्भावनालाई निकट बनाएको टिप्पणी गर्नु भएको थियो । यही सन्दर्भमा परिवारले आफ्नो अपिललाई थप बलियो बनाएका हुन् । फोरमले अघिल्लो वर्षभरि प्रधानमन्त्री नेतान्याहुमाथि विभिन्न युद्धविराम प्रस्तावलाई बारम्बार ‘तोडफोड’ गरेको आरोप लगाउँदै आफ्ना आफन्तको रिहाइ अवरुद्ध गरेको दाबी गर्दै आएको छ । 

यसै महिना कतारमा हमास नेतालाई लक्षित इजरायली आक्रमणपछि पनि फोरमले भनेको थियो, “हरेक पटक सम्झौता नजिकिँदा नेतान्याहुले त्यसलाई तोडफोड गर्नुहुन्छ ।” राष्ट्रपति ट्रम्पलाई पठाइएको पत्रमा भनिएको छः “तपाईसँग मात्र यो सम्झौतालाई अन्तिम सीमामा पुर्याउने शक्ति छ । हामी तपाईंप्रति हाम्रो पक्षमा उभिनु भएकोमा हृदयदेखि आभारी छौँ ।”

तर प्रधानमन्त्री नेतान्याहुले भने विगतका दिनमा आशावादका कम सङ्केत दिनु भएको छ । उहाँले संयुक्त राष्ट्र महासभामा हमासविरुद्ध ‘काम समाप्त गर्ने’ प्रतिज्ञा गर्नु भएको थियो र प्रमुख पश्चिमी मुलुकले मान्यता दिएको प्यालेस्टिनी राज्यलाई रोकिने बताउनुभएको थियो । साथै, गाजा सहरमा जारी आक्रमण रोक्ने कुनै सङ्केत पनि देखाउनुभएको छैन, जहाँबाट लाखौँ मानिस विस्थापित भएका छन् ।

यसबिच, बन्धक परिवारले ट्रम्पलाई नेतान्याहुलाई युद्ध रोक्न दबाब दिन आग्रह गर्दै भनेका छन्, “युद्ध अन्त्य गरेर सबै बन्धकलाई घर ल्याउने तपाईँको दोहोरो ध्यान इजरायलमा चलिरहेको युद्धसँग प्रत्यक्ष विपरीत छ । तर यस फरक धारणाबिच पनि आफ्नो विश्वासमा अडिग रहनु भएकामा हामी तपाईंलाई हार्दिक धन्यवाद दिन चाहन्छौँ ।” रासस/एएफपी