ढाका, भदौ ३१ गते । विद्यार्थी नेतृत्वको विद्रोहपछि पूर्वप्रधानमन्त्री शेख हसिनाको १५ वर्षे निरङ्कुश शासन अन्त्य हुँदै निर्वासनमा भाग्न बाध्य भएपछि बङ्गलादेश राजनीतिक उथलपुथलमा छ । नोबेल पुरस्कार विजेता मुहम्मद युनुसको नेतृत्वमा रहेको अन्तरिम सरकारले आगामी फेब्रुअरीमा निर्वाचन गर्ने वाचा गरेको छ ।
तर १७ करोड जनसङ्ख्या भएको मुस्लिम बहुल मुलुकमा राजनीतिक विभाजन र हिंसा बढ्दै जाँदा शङ्का गहिरिँदै गएको छ । चुनाव अझ पाँच महिना टाढा भए पनि हसिनाको पतनपछिका गठबन्धन विखण्डन हुँदै गएका छन् ।
-मुख्य दलहरू को हुन् ?-
हसिनाको अवामी लिग प्रतिबन्धित भएपछि प्रमुख राजनीतिक खेलाडी बङ्गलादेश नेसनालिस्ट पार्टी (बिएनपी) र इस्लामवादी जमात-ए-इस्लामी रहेका छन् । यससँगै विद्रोहको नेतृत्व गर्ने विद्यार्थी नेताले बनाएको राष्ट्रिय नागरिक पार्टी (एनसिपी) पनि प्रमुख शक्ति बनेको छ । प्रतिद्वन्द्वी दलले सडक हिंसाको आशङ्का व्यक्त गरिरहेका छन् भने युनुसले प्रक्रियामा विश्वास पुनःस्थापित गर्न सङ्घर्ष गरिरहनुभएको छ ।
-युनुस कहाँ उभिनुभएको छ ?-
५० वर्षीय युनुसले चुनावपछि पदत्याग गर्ने घोषणा गर्दै ‘चुनावको विकल्प छैन’ भन्नेमा जोड दिनु भएको छ । तर उहाँको दैनिक राजनीतिबाट दूरी, साथै सेनाको संलग्नता वा समर्थनबारे उठेका प्रश्नले अनिश्चितता बढाएका छन् । सेना प्रमुख जनरल वाकर-उज-जमान र शीर्ष अधिकारीबिच हालै भएका बैठकले अनुमानलाई थप उकासेको छ । विद्रोहको लामो इतिहास बोकेको मुलुकमा सेनाले सदैव निर्णायक भूमिका खेलेको छ ।
-समूह किन विभाजित छन् ?-
मुख्य विवाद ‘जुलाई नेसनल चार्टर’ लाई लिएर छ । यस सुधार दस्तावेजले प्रधानमन्त्रीका लागि दुई कार्यकालको सीमा र राष्ट्रपतिलाई थप अधिकार दिने प्रस्ताव गर्छ । ८४ वटा सुधार बुँदामा सहमति भए पनि त्यसलाई कानुनी रूपमा कसरी लागु गर्ने भन्ने विषयमा दल विभाजित छन् ।
बिएनपीले सुधार चार्टरलाई निर्वाचनपछिको संसदमार्फत मात्र अनुमोदन गर्न सकिने दाबी गर्छ भने अन्य दलले चुनावअघि नै यसलाई कानुनी रूप दिनुपर्ने तर्क गर्छन् । जमातका नेता सैयद अब्दुल्लाह मोहम्मद ताहेरले सुधारमा जनताको राय आवश्यक भएकाले जनमत सङ्ग्रह गर्नुपर्ने बताउनुभयो । एनसिपीका नेता सालेह उद्दीन सिफतले भने ‘विद्रोहमा ज्यान गुमाउनेहरूप्रति विश्वासघात हुने’ भन्दै माग पूरा नभएसम्म चुनावमा सहभागी नहुने चेतावनी दिनुभएको छ ।
-दलबिचको अन्य बहस-
अवामी लिगलाई कार्यकारी आदेशमार्फत प्रतिबन्ध लगाइएको थियो । जमातले हसिनासँग सम्बन्ध भएका थप १३ समूहलाई समेत प्रतिबन्धित गर्नुपर्ने माग गरेको छ । तर बिएनपीले अदालतको प्रक्रिया बिना कुनै दल प्रतिबन्धित हुन नसक्ने भन्दै आपत्ति जनाएको छ । यसबिच, युनुसले लन्डनमा बिएनपी नेता तारिक रहमानसँग भेट गरेपछि पक्षपातको आरोप खेपिरहनु भएको छ । यसले जमात र एनसिपीलाई असन्तुष्ट बनाएको छ ।
-अगाडि के-के चुनौती छन् ?-
अन्तरिम सरकार बढ्दो कानुन-व्यवस्था समस्यामा फसिरहेको छ । विश्व बैँकका पूर्व वरिष्ठ अर्थशास्त्री जाहिद हुसेनले सरकारलाई ‘सौहार्दपूर्ण र साहसी तर असहाय र हतप्रभ’ भन्नुभएको छ । अधिकार समूह ऐन ओ सालिस केन्द्रका अनुसार यस वर्ष मात्रै एक सय २४ वटा भिडन्तका घटना दर्ता भएका छन् । प्रहरी तथ्याङ्कले हत्या, बलात्कार र डकैती बढेको देखाएको छ ।
विश्लेषकका अनुसार युनुसले विश्वसनीय निर्वाचन गराउन पूर्ण सैन्य समर्थन आवश्यक छ । ढाका विश्वविद्यालयका राजनीति विज्ञान प्राध्यापक मामुन अल मुस्तफाले समयमै चुनाव सम्पन्न गर्न ‘सेनाको बिना शर्त र निरन्तर समर्थन’ अपरिहार्य हुने टिप्पणी गर्नु भएको छ । रासस/एएफपी
