कोलम्बियामा २७ जना सैनिकको उद्धार, ४५ जना अझै विद्रोहीको नियन्त्रणमा

बोगोटा, भदौ २३ गते । कोलम्बियाको दक्षिणपश्चिमी क्षेत्रमा विद्रोहीको कब्जामा परेका ७२ जना सैनिक मध्ये २७ जनालाई उद्धार गरिएको छ । बाँकी ४५ जना अझै विद्रोहीको नियन्त्रणमा रहेको सैनिक अधिकारीहरूले जानकारी दिएका छन् ।

यस क्षेत्र विद्रोही गतिविधि र लागु औषध खेतीले प्रभावित रहँदै आएको छ । त्यहाँ सरकारी उपस्थिति निकै कमजोर मानिन्छ, जसले यस्ता घटनालाई दोहोरिन सहज बनाएको छ । सैनिक अधिकारीका अनुसार, सैनिकलाई काउका क्षेत्रमा दिउँसोको समयमा नियन्त्रणमा लिइएको थियो । घटनाको विस्तृत विवरण भने सार्वजनिक गरिएको छैन । पछि सेनाले वक्तव्य जारी गर्दै भनेको छ, “२७ जना सैनिकको सफल उद्धार गरिएको छ । बाँकी ४५ जना अझै पनि नियन्त्रणमा छन्, तर उनीहरूको सुरक्षाका लागि सेना सक्रिय रूपमा कार्यरत छ ।”

अवैध कार्यविरुद्धको अभियानमा अवरोध

सेनाले जनाएको अनुसार, मिकाय क्षेत्रको सैन हुयान नगरमा करिब ६ सय जना स्थानीयले सैनिकहरूको गतिविधिमा अवरोध गरेका थिए । ती सैनिक लागु औषध ओसारपसार र अवैध खानी नियन्त्रण गर्न खटिएका थिए । यो क्षेत्र कोका नामक लागु औषधको मुख्य खेती हुने ठाउँ हो, जहाँ पूर्व विद्रोही सङ्गठन फार्कबाट अलगिएको ‘केन्द्रीय मुख्य समूह’ सक्रिय छ ।

राष्ट्रपतिबाट शान्तिपूर्ण समाधानको आह्वान

राष्ट्रपति गुस्ताभो पेत्रोले सामाजिक सञ्जालमार्फत अपहरणमा परेका सैनिकलाई स्वतन्त्र पार्न आग्रह गर्दै भन्नुभयो,“तिनीहरू तपाईंका छोराहरू हुन् । कोलम्बियाका छोराछोरीहरूले आफ्ना बाबुआमाभन्दा बढी बाँच्छन् भन्ने हामी सबैको चाहना हो ।” उहाँले भन्नुभयो, “मिकायका कृषकले अब अवैध खेतीको सट्टा शान्तिपूर्ण विकल्प रोज्नुपर्ने समय आएको छ । यो परिवर्तनको अवसर हो ।”

यसअघि पनि यस्ता घटना दोहोरिएको थियो

सरकारी तथ्याङ्क अनुसार, यस्ता घटना विद्रोही समूहको निर्देशनमा स्थानीय बासिन्दाबाट गरिन्छ । ती क्षेत्रमा राज्यको उपस्थिति झनै कमजोर छ । यसअघि असार महिनामा पनि सोही क्षेत्रमा ५७ जना सैनिकलाई नियन्त्रणमा लिइएको थियो । पछि सेनाको हस्तक्षेपपछि उनीहरूलाई मुक्त गरिएको थियो । साउनको अन्त्यमा, देशको दक्षिणपूर्वी भागमा पनि ३३ जना सैनिकलाई तीन दिनसम्म नियन्त्रणमा राखिएको थियो । रासस/एएफी