तीन पालिका निमित्तकै भरमा

सर्लाही समाचारदाता

सर्लाही, भदौ १४  गते  । सङ्घीय मामिला तथा सामान्य प्रशासनमन्त्री भगवती न्यौपानेले देशका कुनै पनि पालिकामा निमित्त प्रमुख प्रशासकीय अधिकृत नरहेको घोषणा गरे पनि सर्लाहीका तीन पालिका अझै निमित्तको भरमा छन् । 

मन्त्री न्यौपानेले बिहीबार १२२ उपसचिव र ९७ जना शाखा अधिकृतको एक साथ सरुवा गर्दै देशभरका पालिकालाई निमित्तविहीन बनाइएको घोषणा गर्नुभएको थियो । नगरपालिकामा उपसचिव र गाउँपालिकामा शाखा अधिकृत प्रमुख प्रशासकीय अधिकृत हुने व्यवस्था छ । 

मन्त्रालयले सर्लाहीका लागि तीन जना उपसचिव र पाँच जना शाखा अधिकृत सरुवा गरेर पठाउँदा अझै तीन पालिका छुटेका छन् । हरिपुर नगरपालिका, कविलासी नगरपालिका र विष्णु गाउँपालिका अझै निमित्तकै भरमा रहने भएका छन् । हरिपुर नगरपालिकामा गत वर्ष माघदेखि नै शाखा अधिकृत विनय पौडेलले निमित्त प्रमुख प्रशासकीय अधिकृत भएर काम गरिरहनुभएको छ । कविलासी नगरपालिकामा आयुर्वेद शाखाका वैद्य निरीक्षक राजकिशोर महतोले निमित्त भएर काम गरेको लामो समय भइसकेको छ । 

विष्णु गाउँपालिका पनि बर्सौंदेखि निमित्तकै भरमा चलिरहेको छ । गाउँपालिकामा स्वास्थ्य शाखाका कर्मचारी सञ्जीव सापकोटाले अघिल्लो कार्यकालका जनप्रतिनिधि हुँदादेखि नै निमित्त प्रमुख प्रशासकीय अधिकृत भएर काम गर्दै आइरहनुभएको छ । 

मन्त्रालयले निमित्त प्रमुख प्रशासकीय अधिकृत रहेका जिल्लाका अन्य आठ पालिकामा भने बिहीबार बल्ल प्रमुख प्रशासकीय अधिकृत खटाएको छ । यहाँका तीन नगरपालिकामा उपसचिव र चार गाउँपालिकामा शाखा अधिकृतलाई प्रमुख प्रशासकीय अधिकृतका रूपमा सरुवा गरिएको हो । 

ईश्वरपुर नगरपालिकामा उपसचिव रामप्रसाद पोखरेल, बागमती नगरपालिकामा उपसचिव इन्द्र गौतम र बलरा नगरपालिकामा उपसचिव धर्मानन्द जोशीलाई प्रमुख प्रशासकीय अधिकृतका रूपमा पठाइएको छ । यस्तै चन्द्रनगर गाउँपालिकामा शाखा अधिकृत हरिशङ्कर यादव, धनकौल गाउँपालिकामा शाखा अधिकृत चन्द्रशेखर शर्मा, रामनगर गाउँपालिकामा शाखा अधिकृत उमेश महतो, ब्रह्मपुरी गाउँपालिकामा शाखा अधिकृत धीरेन्द्रकुमार यादव र कौडेना गाउँपालिकामा शाखा अधिकृत उदयशङ्कर चौधरीलाई प्रमुख प्रशासकीय अधिकृत बनाएर खटाइएको छ । 

यी गाउँपालिकामा अहिले प्राविधिक, स्वास्थ्यकर्मी र शिक्षा शाखाका कर्मचारी निमित्त प्रमुख प्रशासकीय अधिकृतका रूपमा कार्यरत छन् । यसअघि पनि मन्त्रालयले बारम्बार उपसचिव र शाखा अधिकृतलाई सरुवा गरेर पठाउँदा केही पालिकामा हाजिर नै नगराउने र कतिपय कर्मचारी आफैँ आउन नमान्ने गरेकाले यस पटक सरुवा गरिएको प्रमुख प्रशासकीय अधिकृत पनि आउने÷नआउने निश्चित छैन ।