सन्तोष दहित
दाङ, भदौ १३ गते । दाङको तीन पालिकामा भदौं १५ गते सार्वजनिक विदा दिने निर्णय भएको छ । दाङ देउखुरी उपत्यकाका लमही नगरपालिका, राप्ती गाउँपालिका र गढवा गाउँपालिकाले सूचना जारी गरी भदौं १५ गते थारू समुदायको अट्वारी पर्व परेकाले उक्त दिन सार्वजनिक विदा दिएको जनाएको छ ।
लमही नगरपालिकाका मेयर जोगराज चौधरीले थारू समुदायको बर्का अट्वारी भदौं १५ गते भएकाले सोही दिन र भदौं १६ गते दुर्इ दिन बिदा दिएको जानकारी दिनुभयो ।
पहिलो दिन व्रत बस्ने र दोस्रो विवाहित चेलीलाई दिन अग्रासन दिन जानुपर्ने भएकोले लमही नगरपालिकाले दुई दिन सार्वजनिक बिदा दिएको उहाँले बताउनुभयो ।
राप्ती गाउँपालिका र गढवा गाउपालिकाले भने भदौं १५ गते अट्वारी भएकोले सार्वजनिक विदा दिएको सूचनामार्फत जानकारी दिएका छन् ।
दाङमा हरेक वर्ष दुर्इ दिन अट्वारी मनाइदै आएको छ । यसअघि दाङ उपत्यकासहित लुम्बिनी र सुदूरपश्चिम प्रदेशमा भदौ ८ गते थारू समुदायले अट्वारी पर्व मनाएका थिए । लुम्बिनी र सुदूरपश्चिम प्रदेश सरकारले भदौं ८ गते अट्वारी पर्वको सार्वजनिक विदा दिएको थियो ।
