प्रवीणकुमार शर्मा
चन्द्रपुर (रौतहट), भदौ १३ गते । संघीय मामिला तथा सामान्य प्रशासनमन्त्री भगवती न्यौपानेले स्थानीय तहमा खटाइएको प्रमुख प्रशासकीय अधिकृत हाजिर हुनैपर्ने बताउनुभएको छ ।
गोरखापत्रसँग कुरा गर्नुहुँदै मन्त्री न्यौपानेले खटाइएको दरबन्दी अनुसारका प्रमुख प्रशासकीय अधिकृतलाइ हाजिर नगराउने स्थानीय तहको हकमा यसअघि मन्त्रालयबाट दिइएको निमित्त प्रमुख प्रशासकीय अधिकृतको आर्थिक जिम्मेबारी रद्द गर्ने बताउनुभयो ।
हाजिर हुन् नजाने कर्मचारीलाई पहिलो चरणमा स्थानीय तहमा जान प्रेरित गर्ने तथा जान नमाने कार्यरत रहेको स्थानमा हाजिर गर्नमा रोक लगाउने उहाँले बताउनुभयो । यस कार्यमा सबै सरोकारवालाले सहयोग गर्न खाँचो रहेको उहाँको भनाइ छ ।
मन्त्रालयले बिहीबार राति गरेको एकसय २२ जना उपसचिव तथा ९७ जना शाखा अधिकृतको सरुवामध्ये रौतहटमा १५ जना उपसचिव तथा एकजना शाखा अधिकृत खटाइएको छ ।
१८ वटा स्थानीय तहमध्ये चन्द्रपुर नगरपालिका र दुर्गाभगवती गाउँपालिका बाहेक १६ वटै स्थानीय तहमा निमित्त प्रमुख प्रशासकीय अधिकृतलाई जिम्मेबारी दिइएको थियो ।
खटाइएका प्रमुख प्रशासकीय अधिकृत हाजिर भएलगत्तै रौतहटका स्थानीय तह निमित्त प्रमुख प्रशासकीय अधिकृतबाट मुक्त हुनेछन् । संघीय मामिला तथा सामान्य प्रशासन मन्त्रालयले रौतहटको माधवनारायण, मौलापुर, फतुवा विजयपुर, इशनाथ, परोहा, राजपुर, कटहरिया, देवाहीगोनाही, वृन्दावन, गरुडा, राजदेवी, गौर, बौधीमाइ, गढिमाइ र गुजरा नगरपालिकामा उपसचिव तथा यमुनामाई गाउँपालिकामा शाखा अधिकृतलाई प्रमुख प्रशासकीय अधिकृतको रुपमा कामकाजमा खटाइएको छ ।
रौतहटका केही नगरपालिकामा मन्त्रालयले गएको ८ बर्षमा उपसचिव स्तरको प्रमुख प्रशासकीय अधिकृत खटाइएको थिएन । मन्त्रालयले काखापाखा नगरी सबै स्थानीय तहमा दरबन्दी अनुसारको प्रमुख प्रशासकीय अधिकृत व्यवस्थापन गरेको कुरा सराहनीय रहेको र यसले बिकास निर्माण, सुशासन, पारदर्शितामा टेवा पुग्ने नेपाल पत्रकार महासंघ रौतहटका पूर्व अध्यक्ष प्रेमचन्द्र झाले बताउनुभयो ।
स्थानीय तहमा बाध्यताले निमित्त प्रमुख प्रशासकीय अधिकृत राखिएको बताउनु हुँदै नेपाल नगरपालिका संघका अध्यक्ष भिमप्रसाद ढुङ्गानाले स्थानीय तहको जिम्मेवारी निमित्तले सम्हाल्दा बिभिन्न समस्या आउनेगरेको बताउनुभयो । मन्त्रालयले दरबन्दी अनुसारको प्रमुख प्रशासकीय अधिकृत पठाएको कुरा स्वागतयोग्य रहेको उहाँले बताउनु भयो ।
गाउँपालिका रास्ट्रिय महासंघ नेपालका अध्यक्ष लक्ष्मीदेवी पाण्डेले स्थानिय तह र प्रमुख प्रशासकीय अधिकृत बीच नङ्क र मासुको सम्बन्ध हुने गरेकोले जनप्रतिनिधि बीच द्वन्द फैलाउने प्रवृतिका कर्मचारीलाई प्रमुख प्रशासकीय अधिकृतमा पठाउन नहुने प्रतिक्रिया दिनु भयो ।
स्थानीय तहमा प्रमुख प्रशासकीय अधिकृत पठाउने जिम्मा संघीय मामिला तथा सामान्य प्रशासन मन्त्रालयको रहेकाले निमित्त पठाएर पुनः दरबन्दी अनुसारको प्रमुख प्रशासकीय अधिकृत पठाउँदा काम गर्न असहज हुने बताउनुभयो । मन्त्रालयले निमित्त हटाउंदै दरबन्दी अनुसारको प्रमुख प्रशासकीय अधिकृत खटाएको कुरा स्वागतयोग्य रहेको र यसले निरन्तरता पाउनुपर्ने उहाँको भनाइ छ ।
