तिम्बुङ पोखरी ट्रेल रन प्रतियोगिता भदौ २६ गते

साहारा लिम्बू
फुङलिङ, भदौ १४ गते । ताप्लेजुङको सिदिङ्वा गाउँपालिकामा दोस्रो तिम्बुङ पोखरी ट्रेल रन प्रतियोगिता हुने भएको छ । गाउँपालिका–१ कालिखोलामा अवस्थित तिम्बुङ पोखरीमा ट्रेल रन प्रतियोगिता हुने भएको हो ।

चार हजार ३५० मिटरको उचाइमा प्रतियोगिता आगामी भदौ २६ गते हुने शुक्रबार पत्रकार सम्मेलन मार्फत जानकारी गराइएको छ । तिम्बुङ पोखरी संरक्षण तथा अव्यवस्थापन समितिको आयोजनामा सञ्चालन हुने प्रतियोगिताको दूरी १५ किलोमिटर कायम गरिएको छ ।

ट्रेल प्रतियोगिताका लागि तिम्बुङ पोखरीदेखि पङ्दुवा पुगी फर्केर ठुलो भञ्ज्याङसम्मको रुट निर्धारण गरिएको छ । कार्यक्रमको समापन समारोह भञ्ज्याङमा हुने छ । प्रतियोगिताको खुल्ला तर्फका विजेताले नगद ५० हजार रुपियाँ सहित ट्रफी, मेडल प्रमाण पत्र प्राप्त गर्ने कार्यक्रम संयोजक अमिर राईले बताउनुभयो ।

उहाँका अनुसार दोस्रो र तेस्रोलाई क्रमश नगद ३५ हजार र २५ हजार रुपियाँसहित ट्रफी मेडल र प्रमाण पत्र प्राप्त गर्ने छन् । यस्तै महिला प्रथमले २५ हजार रुपियाँ र स्थानीय तर्फका प्रथमले १५ हजार रुपियाँ प्राप्त गर्ने संयोजक राईको भनाइ छ ।

प्रतियोगिता सञ्चालनका लागि करिब १६ लाख रुपियाँका खर्च हुने अनुमान गरिएको आयोजकले जनाएको छ । जसमा सिदिङ्वा गाउँपालिकाले ११ लाख साथै पर्यटन कार्यालय काँकरभिट्टाले पाँच लाख रुपियाँ सहयोग गर्ने पनि जानकारी गराइएको छ ।

गत वर्ष पहिलो पटक तिम्बुङ पोखरी ट्रेल रन प्रतियोगिता सञ्चालन गरिएको थियो । उक्त प्रतियोगिता सम्पन्न पछि तिम्बुङ पोखरीमा पर्यटकको सङ्ख्या हत्तै बढेको संयोजक राईले बताउँनुभयो । प्रतियोगिता पछि तीन हजारभन्दा बढी आन्तरिक तथा बाह्य पर्यटकले तिम्बुङ पोखरीको अनुमान गरेको राईको भनाइ छ ।

ताप्लेजुङ र पाँचथरको सिमानामा रहेको यो पोखरीको प्रचार प्रसारसँगै पर्यटन प्रवर्धनका लागि प्रतियोगिताको आयोजना गरिएको सिदिङ्वा गाउँपालिका–१ कालिखोलाका वडाध्यक्ष गोपाल बनियाले बताउनुभयो । यस्तै यो वर्षदेखि तिम्बुङ पोखरीको प्रचारसँगै पर्यटन प्रवर्धनमा सहयोग पुर्याएका पत्रकारलाई पनि नगद २५ हजार रुपियाँ सहित सम्मान गरिने आयोजकको भनाइ छ ।