• १४ भदौ २०८२, शनिबार

सुनवल नगर अस्पतालको भवन निर्माण सुरु

blog

निर्माण कार्य सुरु भएको अस्प्ताल भवन । तस्बिरः कल्पना खरेल

कल्पना खरेल

नवलपरासी पश्चिम, भदौ १४ गते । तीन वर्षदेखि अलपत्र परेको नवलपरासी पश्चिममा सुनवल नगरपालिका–५, वनकट्टीमा नगर अस्पतालको भवन निर्माणको काम सुरु भएको छ । 

वि.स. २०७८ भदौ २० गते करिब ९ करोड ४६ लाखमा सम्झौता भई निर्माण कार्य सुरु भएको नगरअस्पताल स्वास्थ्य मन्त्रालयले डिपिआर परिमार्जन गर्नुपर्ने भन्दै स्वीकृति दिन नमानेपछि तीन महिनापछि निर्माण कार्य रोकिएको थियो । 

उता अस्पतालको नाममा स्वामित्व नभएको भन्दै जग्गा विवादको अख्तियारमा मुद्दा र ठेकदारद्वारा अदालतमा मुद्दा समेत तत्कालीन स्थानीय सरकारले खेपिरहेको थियो । 

करिब ३ वर्षपछि वि.स. २०८१ पुसमा सबै समस्या फुकाएर पुनः नगरअस्पताल निर्माण कार्यलाई अगाडि बढाइएकाले हाल अस्पतालकै स्वामित्वमा जग्गा रहेको सुनवल नगर प्रमुख विमला अर्यालले बताउनुभयो । 

नगर अस्पताल निर्माणसगैँ हालसम्म सामान्य उपचारका लागि छिमेकी जिल्ला बुटवल र चितवन जानुपर्ने जनताको बाध्यताको अन्त्य हुने उहाँको भनाइ छ ।  

१८ महिनाभित्र सम्पन्न गरी नगरपालिकालाई हस्तान्तरण गर्ने सम्झौतासहित एन.बि. कन्ट्रक्सन बुटवललाई ठेक्का दिइएको छ । नगरअस्पताल लिफ्ट सिस्टम, अपाङ्गमैत्रीसहित १५ शय्याको तीन तलाको अध्याधुनिक सुविधा सम्पन्न हुने छ । 

सुनवल नगरपालिकाको गौरवको योजनामध्ये रहेको नगर अस्पताल निर्माणसगैँ १३ वटा वडाको ७५ हजार स्थानीयहरु प्रत्येक्ष लाभाम्बित हुने वडा ५ का वडा अध्यक्ष नेत्रलाल शर्मा तिवारीले बताउनुभयो । निर्माणकार्य सम्पन्न पश्चात एक एमबिबिएस डाक्टरसहित अस्पताल सञ्चालनमा ल्याइने सुनवल नगरपालिकाले जनाएको छ ।