विश्वकप रजत विजेता खो खो टिम उत्कृष्ट

गोरखापत्र समाचारदाता

काठमाडौँ, भदौ १४ गते । राष्ट्रिय खेलकुद परिषद् (राखेप) ले शुक्रबार आफ्नो ६२ औँ वार्षिकोत्सवका अवसरमा राष्ट्रिय पुरुष/महिला खो खो टोलीलाई उत्कृष्ट अवार्डसहित पुरस्कृत गरेको छ । खो खो टिम सिनियरतर्फ पुरस्कृत भएको हो । पुरुष/महिला टोलीलाई समान एक/एक लाख नगद पुरस्कारसहित ट्रफी प्रदान गरियो । दुवै टिमले भारतमा भएको प्रथम खो खो विश्वकप तथा नेपाल र भारतबिच भएको टेस्ट म्याचमा रजत जितेका थिए । यसै गरी उत्कृष्ट राष्ट्रिय खेल सङ्घमा नेपाल क्रिकेट सङ्घ (क्यान) एक लाख रुपियाँसहित पुरस्कृत भयो ।

पुरुषतर्फ बक्सिङका अर्पिल राना उत्कृष्ट जुनियर खेलाडी बन्नुभयो । जुनियर महिलातर्फ राष्ट्रिय महिला यु–१९ टिमकी कप्तान तथा राष्ट्रिय महिला राष्ट्रिय टोलीकी उपकप्तान पूजा महतोलाई प्रदान गरिएको छ । दुवैले ५० हजार रुपियाँ पाए ।

पेरिस पारालम्पिक्समा ऐतिहासिक कांस्य जितेकी पलेशा गोवर्धनलाई पारा खेलाडी वर्ष पुरस्कार प्रदान गरिएको छ । पलेशालाई ५० हजार रुपियाँसहित सम्मान गरियो । खेलकुद पत्रकार पुरस्कार ‘मेरो खेल डट कम’ का सम्पादक लक्ष्मी शाक्यले र ‘खेलाडी डट कम’ का अन्जन खड्काले प्राप्त गर्नुभयो । 

सो कार्यक्रममा मन्त्री तेजुलाल चौधरीले एसियाली खेलकुदमा जाने खेलाडीका लागि बजेट अघि बढिसकेको जानकारी दिनुभयो । उहाँले नेपाल सरकारले खेलकुदको विकासका लागि हरकदमले सहयोग गर्ने प्रतिबद्धता व्यक्त गर्नुभयो । मन्त्री चौधरीले सुविधा सम्पन्न रङ्गशाला निर्माणका लागि सूर्यविनायक  नगरपालिकासँग स्वीकृति लिएर काम नै अघि बढेको पनि बताउनुभयो । 

यसै गरी कर्मचारीतर्फ सर्वोत्कृष्ट परिषद् सेवा पुरस्कारबाट परिषद्को सचिवालयका नायब वरिष्ठ प्रशासकीय अधिकृत फणीन्द्रप्रसाद पौडेल (प्रशासन) तथा दाङ जिल्ला खेलकुद विकास समितिका तेक्वान्दो प्रशिक्षक भीमलाल विक (प्रशिक्षण) पुरस्कृत हुनुभयो । उत्कृष्ट परिषद् सेवा पुरस्कारको प्रशासनमा सङ्घ संस्था समन्वय शाखाकी नायब वरिष्ठ प्रशासकीय अधिकृत प्रभा कर्माचार्य र प्रशिक्षणमा ललितपुर जिल्ला खेलकुद विकास समितिका तेक्वान्दो प्रशिक्षक तुल्सीनन्द वज्राचार्य पुरस्कृत हुनुभयो ।

परिषद् सेवा पुरस्कारको प्रशासनमा ललितपुर जिल्ला खेलकुद विकास समितिका प्रशासकीय अधिकृत बाबुकाजी श्रेष्ठ र प्रशिक्षणमा तालिम तथा प्रशिक्षण विभागकी नायब वरिष्ठ एथलेटिक्स प्रशिक्षक उषाकर्ण चौधरी सम्मानित हुनुभयो । करार सेवा पुरस्कारको प्रशिक्षणमा काठमाडौँ जिल्ला खेलकुद विकास समितिका सहायक कराँते प्रशिक्षकद्वय सङ्घरत्न महर्जन र कुशल श्रेष्ठ तथा प्रशासनमा राष्ट्रिय टिम तयारीकी सहायक द्वितीय दीपिका केसी र प्रशासन विभागका कार्यालय सहयोगी दुर्गा थापा पुरस्कृत हुनुभयो । युवा तथा खेलकुदमन्त्री तेजुलाल चौधरी, राखेपका उपाध्यक्ष ध्रुव आचार्य, राखेपका सदस्यसचिव टङ्कलाल घिसिङलगायतले एक कार्यक्रमबिच पुरस्कृत गर्नुभयो ।