काठमाडौँ, भदौ १३ गते । नेपाली कांग्रेसका केन्द्रीय सदस्य तथा शिक्षा विभाग प्रमुख नैनसिंह महरले शैक्षिक परामर्श क्षेत्रलाई व्यवस्थित बनाउन सरकारलाई सक्रिय भूमिका निर्वाह गर्न आग्रह गर्नु भएको छ ।
शैक्षिक परामर्श क्षेत्र सुधारका लागि १० बुँदे प्रस्ताव सार्वजनिक गर्दै महरले शिक्षा मन्त्रालयको ध्यानाकर्षण गराउनु भएको हो ।
उहाँले नेपाललाई अन्तर्राष्ट्रिय शैक्षिक हबका रूपमा विकास गर्न परामर्श क्षेत्रलाई साझेदारका रूपमा अघि बढाउनुपर्ने आवश्यकता औंल्याउनु भयो ।
‘‘परामर्श व्यवसायलाई कानुनी र नीतिगत रूपमा स्पष्टता ल्याउनुपर्छ। विदेशी विद्यार्थीलाई आकर्षित गर्न छात्रवृत्ति कोटा व्यवस्था गर्नुपर्छ। अन्तर्राष्ट्रिय विद्यार्थी भिसा नीति शीघ्र लागू गर्नुपर्छ ।’’ विज्ञप्तिमा महरले उल्लेख गर्नुभएको छ ।
उहाँले कम्पनी ऐनअनुसार दर्ता नगरी वा इजाजतपत्रविहीन रूपमा सञ्चालन भइरहेका परामर्श संस्थामाथि कारबाही गर्नुपर्ने, अनलाइनमार्फत मात्र विदेश पठाउने ‘एडटेक कम्पनी’हरूको नियन्त्रण गर्नुपर्ने र ठगी तथा विसङ्गति रोक्न धरौटी प्रणाली र नियमित अनुगमन व्यवस्था गर्नुपर्ने सुझाव पनि दिनु भएको छ ।
त्यसैगरी, विदेशमा अध्ययन गर्न जाने विद्यार्थीलाई न्यूनतम मापदण्ड पूरा गरेका विश्वविद्यालयमै पठाउनुपर्ने र यसले ‘ब्रेन गेन’लाई प्रोत्साहन गर्ने उहाँको छ ।
फर्जी कागजात, अवैध वित्तीय कारोबार, कृत्य विवाह र मनि लण्ड्रिङमा संलग्न परामर्श संस्थामाथि शून्य सहनशीलताको आधारमा कारबाही गर्नुपर्नेमा उहाँले जोड दिनु भयो ।
साथै, विदेशी कम्पनीहरूले विभिन्न सेमिनार र एक्स्पोमार्फत बढाउँदै लगेको सक्रियतालाई तत्काल नियन्त्रण गर्नुपर्ने आवश्यकता पनि औंल्याउनु भयो ।
विज्ञप्तिमा भनिएको छ, ‘‘शिक्षा राष्ट्रको मेरुदण्ड हो। पारदर्शिता, उत्तरदायित्व र गुणस्तर कायम नगरी अन्तर्राष्ट्रिय प्रतिस्पर्धामा टिक्न सकिँदैन, त्यसैले शिक्षा मन्त्रालयले ढिलाइ नगरी ठोस कदम चाल्नुपर्ने बेला आएको छ।’’
