खानेपानीको रकम भुक्तानी अझै भएन

अमरगढी समाचारदाता

डडेलधुरा, भदौ ४ गते । डोटीका दुई वटा पालिकासँग सीमा जोडिएको महाभारत पर्वतमा अवस्थित गन्यापधुरा गाउँपालिकाको मुकाम बडालमा खानेपानी पुर्‍याइएको छ तर खानेपानी पुर्‍याइए पनि काम गरेका मजदुर र निर्माण सामग्री खरिदबापतको करिब २५ लाख रुपियाँ तिर्न अझै बाँकी छ । 

शिखरधुरा ताल क्षेत्रबाट १४ किलोमिटर लामो पाइपलाइन बिछ्याएर वडा नम्बर २ गणेशपुर, बडाल क्षेत्रमा खानेपानी पुर्‍याइएको हो । गन्यापधुरा गाउँपालिका नेपाली कांग्रेसका सभापति एवं पूर्व प्रधानमन्त्री शेरबहादुर देउवाको गाउँपालिका हो । उहाँको पालिकामा गत वर्ष खानेपानीको योजना पूरा भएको हो । 

२०७६ मा ग्रामीण जलस्रोत व्यवस्थापन (आरभिडब्लुआरएमपी) नामक गैरसरकारी संस्थाको ५२ लाख रकममा खानेपानी योजनाको काम सुरुवात गरिएको फरपाडी खानेपानी उपभोक्ता समितिका अध्यक्ष नरबहादुर मालीले जानकारी दिनुभयो । बडालबाट पानीको मुहानसम्म एक कट्टा सिमेन्ट पुर्‍याउँदा एक हजार छ सय ज्याला मात्रै लाग्यो । मजदुर नपाइने समस्या भयो । मुहान क्षेत्रमा एक कट्टा सिमेन्ट पुर्‍याउँदा दुई हजार छ सय मूल्य पर्‍यो । अनि कसरी काम सम्पन्न गर्ने ?

उहाँले आयोजना खर्चिलो भयो । श्रमिक महँगो पाउनुका साथै खानेपानी पाइप पनि महँगो भएको बताउनुभयो । मजदुरलाई १० लाख र निर्माण सामग्रीको १५ लाख गरेर करिब २५ लाख रुपियाँ भुक्तानी गर्न बाँकी छ । बाँकी रहेको रकम भुक्तानीका लागि गाउँपालिकासँग माग गरिएको उहाँले बताउनुभयो ।