त्रिविमा एकीकृत वित्तीय प्रणाली लागु

गोरखापत्र समाचारदाता 

काठमाडौँ, साउन २१ गते । त्रिभुवन विश्वविद्यालयले चालु आर्थिक वर्षबाट लागु हुने गरी एकीकृत वित्तीय व्यवस्थापन प्रणाली सञ्चालनमा ल्याएको छ । यो प्रणाली त्रिवि केन्द्रीय कार्यालयबाटै अनुगमन गर्न सक्ने वेबमा आधारित आर्थिक व्यवस्थापन सफ्टवेयर हो । त्रिविका रजिस्ट्रार प्राडा केदारप्रसाद रिजालले हालसम्म कुनै लेखा सफ्टवेयर नचलाएका र विभिन्न किसिमका सफ्टवेयर चलाइरहेका त्रिविमातहतका १६० वटै बजेटरी निकायमा अब एकै किसिमको सफ्टवेयर प्रयोगमा आएकाले एकरूपता कायम हुने विश्वास व्यक्त गर्नुभयो । 

इरासफ्ट सोलुसन प्रालि र योङ माइन्ड क्रियसनले गत कात्तिकबाट त्रिविसँग सम्झौता गरी सफ्टवेयर निर्माणको काम गरेको प्रालिका प्रबन्ध निर्देशक ओम खड्काले जानकारी दिनुभयो । नौ वटा मोडलमध्ये मुख्य लेखा अन्तर्गत भौचर र तलबका दुई मोडलको काम सम्पन्न गरी सरोकारवालालाई चारदिने तालिम पनि दिइसकिएको जनाइएको छ । त्रिवि अन्तर्गत उपत्यकाभित्रका लेखा अधिकृतलाई चार समूहमा विभाजन गरी साउन १५ देखि १९ सम्म तालिम  सञ्चालन गरिएको इरासफ्ट प्रालिका कार्यक्रम संयोजक तुलसी सिवाकोटीले जानकारी दिनुभयो ।