तम्घास समाचारदाता
तम्घास (गुल्मी), साउन १८ गते । विसं २०७७ मङ्सिर १५ गते तामझामका साथ १५ शय्याका अस्पताल शिलान्यास भएको पाँच वर्ष पुग्न लाग्दा पनि अधिकांशका निर्माण अधुरै रहेका छन् । तत्कालीन प्रधानमन्त्री केपी शर्मा ओलीको नेतृत्वमा देशभरका ३९६ स्थानीय तहमा एकै दिन अस्पताल शिलान्यास गर्ने सरकारी घोषणा अनुसार गुल्मीमा समेत धुमधामका साथ शिलान्यास गरिएको थियो । अहिले कतै अस्पताल निर्माणमा ढिलाइ भएको छ भने कतै काम नै सुरु भएको छैन ।
छत्रकोटमा बोलपत्रको तयारी
छत्रकोट–४, शृङ्गामा शिलान्यास गरिएको अस्पताल अझै अन्योलमा छ । शिलान्यास गरिएको जग्गा मापदण्ड अनुसार नपरेकाले करिब तीन सय मिटर पर नयाँ जग्गा व्यवस्थापन गरिएको छ । गाउँपालिका अध्यक्ष रामप्रसाद पाण्डेले अब बोलपत्र प्रक्रिया अघि बढाउने तयारी भइरहेको जानकारी दिनुभयो । यसै गरी अर्खबाङमा पूर्वमन्त्री गोकर्णराज विष्टले शिलान्यास गर्नुभएको अस्पताल लामो समयसम्म स्थगित रह्यो । उपाध्यक्ष उपेन्द्र अर्यालले हाल भने मापदण्ड अनुसारको नयाँ जग्गा पहिचान गरी घडेरी सम्याउने काम भइरहेको बताउनुभयो ।
सत्यवती, मदाने र मुसीकोटमा काम हुँदै
जोहाङमा निर्माणाधीन अस्पतालको काम ७० प्रतिशत पूरा भएको छ । १२ करोड रुपियाँको लागतमा आशिष–योगेश्वर जेभीले निर्माणको जिम्मा लिएको हो । यस्तै पुर्कोटदहमा निर्माण भइरहेको अस्पतालको ७५ प्रतिशत भौतिक र ६८ प्रतिशत आर्थिक प्रगति भएको छ । मुसीकोट–७ मा १५ शय्याको अस्पतालको ७५ प्रतिशत काम सकिएको छ । खिम्ती–श्रेष्ठ–कालीगण्डकी जेभीले ११ करोड १० लाख लागतमा निर्माण गरिरहेको हो ।
दुई अस्पताल निर्माण सम्पन्न
गुल्मीदरबार–३, झाँक्रीडाँडामा निर्माण सम्पन्न भई केही महिनाअघिदेखि अस्पताल सञ्चालनमा आइसकेको छ । चन्द्रकोट–४, शान्तिपुरस्थित अर्को अस्पताल पनि निर्माण सम्पन्न भई हस्तान्तरणको तयारीमा रहेको छ ।
रुरुक्षेत्रमा काम अगाडि
रातामाटामा निर्माणाधीन अस्पतालमा ८५ प्रतिशत भौतिक र ७५ प्रतिशत वित्तीय प्रगति भएको छ । १४ करोड ४२ लाख रुपियाँ लागतको काम प्रकृति–पिटिआर–अधिकारी–राजेश्वरी जेभी सन्धिखर्कले गरिरहेको हो । यसै गरी पूर्वपरराष्ट्रमन्त्री प्रदीप ज्ञवालीले शिलान्यास गर्नुभएको कनौटास्थित अस्पतालको ५० प्रतिशत भौतिक र ४२ प्रतिशत वित्तीय प्रगति भएको छ । प्रमुख प्रशासकीय अधिकृत नरेश गिरीका अनुसार अब भने काम छिटो अगाडि बढाउने तयारी भइरहेको छ ।
धुर्कोटमा र इस्मामा निर्माण हुँदै
धुर्कोट रजस्थलमा पहिरोका कारण ढिलाइ भएको अस्पताल निर्माण अब करिब १५ प्रतिशत भौतिक प्रगति भएको अवस्थामा छ । १३ करोड रुपियाँको लागतमा उक्त आयोजना रविना–अर्जुन–न्यु लिजा जेभीले निर्माण गरिरहेको छ । इस्मा–४, दोहलीस्थित गुरुङगाडेमा निर्माणाधीन अस्पतालको ३२ प्रतिशत काम सम्पन्न भएको छ । अध्यक्ष भगतसिंह खड्काका अनुसार निर्माणको जिम्मा सुनील समीर निर्माण सेवाले लिएको हो ।
