काठमाडौँ, वैशाख २५ गते । पूर्वप्रधानन्यायाधीश कल्याण श्रेष्ठले सरकारले कुष्ठरोगसम्बन्धी व्यापक रणनीति बनाउन जरुरी रहेको बताउनुभएको छ । बिहीबार काठमाडौँमा कुष्ठरोगसम्बन्धी अन्तर्राष्ट्रिय सम्मेलन उद्घाटन गर्नुहुँदै उहाँले यस्तो बताउनुभएको हो ।
स्वास्थ्य मन्त्रालयले कुष्ठरोगीलाई औषधी र उपचारको मात्रै व्यवस्था गरेर नपुग्ने भन्दै उहाँले कुष्ठरोगको सम्बन्धमा विशेष रणनीति बनाउन जरुरी रहेको बताउनुभयो । उहाँले शिक्षा, स्वास्थ्य, रोजगारी जस्ता र जीवनस्तर र सार्वजनकि निर्णय प्रक्रियामा सहभागिता हुने समावेशिताको सिद्धान्त कुष्ठरोगबाट निको भइसकेका व्यक्तिहरुलाई समावेश गर्न जरुरी रहेको जानकारी दिनुभयो । उनीहरुलाई स्थान दिएमात्रै उनीहरले आत्मसम्मान पाउने र आत्मविश्वास जाग्ने बताउनुभयो ।
पूर्वप्रधानन्यायाधीश श्रेष्ठले भन्नुभयो, ‘‘स्वास्थ्य मन्त्रालयले औषधि र उपचारको मात्रै व्यवस्था गरेर पुग्दैन । यो कुष्ठरोगको सम्बन्धमा एउटा कन्प्रिहेन्सिभ स्टाटेजी डेभलप गर्नुपर्छ । शिक्षा, स्वास्थ्य, रोजगारी जस्ता र जीवनस्तर र सार्वजनकि निर्णय प्रक्रियामा सहभागिता हुने समावेशिताको सिद्धान्त लगायतमा उनीहरुलाई हामीले स्पेश दियौँ भने तब उसको आत्मसम्मान जागेर आउँछ । उसको आत्मविश्वास जागेर आउँछ । यसको क्षमता, प्रतिभाको भरपुर प्रयोग गर्नसक्ने सम्भावना जागेर आउँछ ।’’
पूर्वप्रधानन्यायाधीश श्रेष्ठले कुष्ठरोगीले म कुष्ठरोगी हुँ भन्नेकुरा गर्वका साथ भन्नसक्ने स्थिति निर्माण गर्न जरुरी रहेको बताउनुभयो ।
