बाँकेमा लागु औषध कारोवारीको बिगबिगी

लक्ष्मी तिमिल्सेना
जमुनाह, चैत २४ गते । जिल्ला प्रहरी कार्यालय बाँकेले गत आर्थिक वर्षमा दुई सय ६४ जना लागु औषध कारोवारीविरुद्ध मुद्दा अघि बढाएको छ । जिल्ला प्रहरी कार्यालय बाँकेका प्रहरी निरीक्षक यामबहादुर मल्लका अनुसार दुई सय ६४ जना लागु औषध कारोवारीमध्ये नेपाली पुरुष दुई सय ४५ जना, भारतीय पुरुष १२ जना तथा नेपाली महिला सात जना छन् ।

चालु आर्थिक वर्षको हालसम्म यसको ग्राफ बढेर दुई सय ३९ जना पुगी सकेका छन् । जसमा दुई सय १४ जना नेपाली पुरुष, आठ जना भारतीय पुरुष तथा नेपाली महिला १७ जना छन् । उनिहरु विरुद्ध जिल्ला प्रहरी कार्यालय बाँकेले लागु औषध कारोवार मुद्दा चलाएको अवस्था छ । यस आर्थिक वर्षको अन्त्यसम्ममा यो सङ्ख्या अझ बढ्न सक्ने प्रहरीको अनुमान छ ।

जिल्ला प्रहरी कार्यालयको तथ्याङ्क अनुसार गत आर्थिक वर्षमा जिल्ला प्रहरी कार्यालय बाँकेले नौ सय ९५ ग्राम ब्राउन सुगर बरामद गरेको थियो । तर चालु आर्थिक वर्षको अहिलेसम्म भने २ केजी ४ ग्राम ८ सय ८३ मिलिग्राम ब्राउन सुगर बरामद गरिसकेको छ ।

ब्राउन सुगरको कारोवार बढेपनि चरेसको कारोबार भने केहि घटेको छ । गत आर्थिक वर्षमा १६ केजी चरेस बरामद गरेको बाँके प्रहरीले चालु आर्थिक वर्षको अहिलेसम्म भने ४ केजी मात्रै चरेस बरामद गरेको छ ।

यस आर्थिक वर्षको हालसम्म अफिम भने बरामद भएको छैन । यद्यपी गत आर्थिक वर्षमा १५ केजी अफिम बरामद भएको थियो ।

अघिल्लो आर्थिक वर्षमा ५ केजी ८ सय ६८ ग्राम गाँजा बरामद गरेको बाँके प्रहरीले यस वर्ष २ केजी २ सय ५० ग्राम मात्रै बरामद गरेको छ ।

अघिल्लो आर्थिक वर्षमा कोरेक्स ३ लिटर ३ सय मिलिलिटर बरामद भएको बाँके जिल्लामा यस वर्ष भने देखिएको छैन ।नाइट्रोजेपाम गत आर्थिक वर्षमा ८ सय १२ ट्याब्लेट बरामद भएकोमा यस आर्थिक वर्षमा ३ हजार ४ सय ६२ बरामद भएको छ ।

ट्रामाडोल गत आर्थिक वर्षमा बरामद भएको थिएन भने अहिलेसम्म ५ हजार ट्याब्लेट बरामद भइसकेको जिल्ला प्रहरी कार्यालय बाँकेका प्रहरी निरीक्षक मल्लले जानकारी दिनुभयो ।

विभिन्न प्रकारका लागु औषधहरूको अवैध कारोबार भइरहेको अवस्था बारे जानकारी दिँदै प्रहरी निरिक्षक मल्लले यस्ता कारोबारीहरूलाई सूचनाका आधारमा र लागु औषध नियन्त्रण ब्युरोको अनुसन्धानका आधारमा पक्राउ गरी मुद्दा अगाडि बढाउने गरेको जानकारी दिनुभयो ।