दिनेश लुइटेल
काठमाडौँ, चैत २३ गते । नेकपा (एमाले) नेता एवम् पाल्पा क्षेत्र नम्बर १ का प्रतिनिधि सभा सदस्य नारायणप्रसाद आचार्यले काठमाडौँको स्वार्थ केन्द्रित मानसिकता नफेरिएसम्म देश नबन्ने बताउनुभएको छ । गोरखापत्र अनलाइनको ‘सांसदलाई सवाल’मा कुराकानी गर्नुहुँदै उहाँले यस्तो बताउनुभएको हो ।
काठमाडौँमा आउने मान्छे स्वार्थमा केन्द्रित हुँदा गाउँको विकास हुन नसकेको ठहर उहाँको छ । उहाँले स्थानीय तहसँगको सहकार्यमा रोजगारीका लागि पहल भइराखेको समेत बताउनुभएको छ । उहाँले गाउँको कृषिलाई आधुनिकीकरणमा विशेष जोड दिनुभएको छ ।
सांसद आचार्यको जन्म पाल्पाको पूर्वखोला गाउँपालिका वडा नम्बर ३ तल्लाफाँट साविक रङनेरइ गाविस–१० मा बुवा डिल्लीप्रसाद र आमा जेमकान्ति आचार्यको कोखबाट २०२६ साल पुस ९ गते भएको हो ।
उहाँले औपचारिक शिक्षा उर्वुद्ध माध्यमिक विद्यालय पूर्वखोलाबाट प्राप्त गर्नुभएको हो । २०४६ सालमा एसएलसी उतीर्ण हुनुभएका आचार्यले पाल्पाको त्रिभुवन क्याम्पसबाट उच्च शिक्षा लिनुभयो । त्यसपछि भने उहाँ निरन्तर राजनीतिमै सक्रिय हुनुहुन्छ । अनेरास्ववियु, पार्टी सङ्गठित सदस्य भएपछि उहाँ गाउँ कमिटी, क्षेत्रीय कमिटी, जिल्ला कमिटी हुँदै राजनीतिमा सक्रिय हुनुभएको हो । उहाँसँग शिक्षाको क्षेत्रमा विशेषज्ञता छ । विभिन्न विद्यालय र क्याम्पसमा व्यवस्थापन समिति सदस्य भएर काम गर्नुभयो । सामुदायिक वन र सामुदायिक बिजुलीको अभियानमा सक्रिय उहाँसँग एमालेको राजनीति गरेको लामो अनुभव छ ।
आचार्य २०३९ सालमा अनेरास्ववियुको सदस्यता लिँदै राजनीतिमा सक्रिय हुनुभएको हो । उहाँले २०४४ सालमा नेकपा मालेको सदस्य बन्नुभयो । २०५० सालबाट आचार्य पार्टी राजनीतिमा सक्रिय हुनुहुन्छ । उहाँ २०५४ सालमा नेकपा (एमाले) को तर्फबाट रिङनेरइ गाविसको अध्यक्ष निर्वाचित बन्नुभयो ।
गाविस अध्यक्ष भएपछि उहाँ राजनीतिमा पूर्णकालीन बन्नुभयो । २०५५ सालमा जिल्ला कमिटी सदस्य बन्नुभएका आचार्य २०६६ सालमा जिल्ला कमिटी उपाध्यक्ष र २०७३ सालमा जिल्ला कमिटी अध्यक्ष बन्नुभयो । आचार्य लुम्बिनी प्रदेश सभाको संस्थापक सदस्य हुनुहुन्छ । उहाँ २०७४ को निर्वाचनमा पाल्पा १ (ख)बाट लुम्बिनी प्रदेश सभा सदस्य निर्वाचित हुनुभएको हो । उहाँ एमाले लुम्बिनी प्रदेश सङ्गठन सचिवालय सदस्यसमेत हुनुहुन्छ ।
प्रस्तुत छ– नेकपा (एमाले) नेता एवम् पाल्पा–१ का प्रतिनिधि सभा सदस्य नारायणप्रसाद आचार्यसँग गोरखापत्र अनलाइनको ‘सांसदलाई सवाल’मा दिनेश लुइटेलले गरेको कुराकानीका आधारमा मनोजरत्न शाही र केशब गुरुङले तयार पर्नुभएको भिडियो सामग्री :
-square-thumb.jpg)
-original-thumb.jpg)
