गोरखापत्र समाचारदाता
काठमाडौँ, चैत २३ गते । पाँच जना महिला कलाकारको संयुक्त कला प्रदर्शनी काठमाडौँको बबरमहलस्थित नेपाल कला परिषद्मा शुक्रबारदेखि सुरु भएको छ । ‘टुगेदरनेस’ शीर्षकमा सुरु भएको कला प्रदर्शनीको वरिष्ठ साहित्यकार पद्मावती सिंहले एक समारोहबिच उद्घाटन गर्नुभयो । कार्यक्रममा उहाँले कलाकार तथा साहित्यकार कृति शाह चन्दको पहिलो कवितासङ्ग्रह ‘सम्मिश्रण’ को विमोचनसमेत गर्नुभएको थियो ।
कार्यव्रmममा उहाँले कला र साहित्य राष्ट्रको धरोहर भएको बताउनुभयो । उहाँले भन्नुभयो, “म कला खासै बुझ्दिनँ तर पनि आँखाले हेर्दा हृदय छोयो भने त्यो कला चाहिँ सशक्त हो भने लाग्दछ, मैले हेर्दा पाँच महिला कलाकारले बनाएको कलाले मेरो हृदय छोएको छ, यो नरोक्नुहोला । यसरी महिला कलाकार एकजुट भएर अगाडि बढ्नु महìवपूर्ण कुरा हो ।” उहाँले कवयित्री कृति शाह चन्दको पहिलो कवितासङ्ग्रह सम्मिश्रणमा लेखकले आफ्नो जीवनको भोगाइ र जीवनको अनुभूतिलाई कवितामार्फत सम्प्रेषण गर्नुभएको पाएको बताउँदै साधना नछाड्न अनुरोध गर्नुभयो ।
वरिष्ठ कलाकार शशिविव्रmम शाहले कला प्रदर्शनीमा नेपाली माटोमा भिजेको हाम्रो कलालाई लयमा उतारिएको बताउनुभयो । महिला कलाकारको संयुक्त कला हेर्दा बडो आनन्द लागेको बताउँदै उहाँले यसरी समूहगत रूपमा काम गर्दा समाजमा ठुलो प्रभाव पर्ने औँल्याउनुभयो । उहाँले भन्नुभयो, “यो प्रयत्नले समाजमा कलासम्बन्धी चेतना बढ्छ, यस्ता प्रदर्शनीलाई निरन्तरता दिनु पर्छ ।”
‘दुगेदरनेस’ शीर्षकमा आयोजित संयुक्त कला प्रदर्शनीमा कवि तथा कलाकार कृति शाह चन्द, किपा राणा, सगुन शाह चन्द, पूजा अग्रवाल र सन्ध्या सिंह महर्जनका कलाकृति रहेका छन् । चार दिनसम्म चल्ने कला प्रदर्शनीमा मूर्त, अमूर्त, यथार्थवादी, समसामयिक, न्युड तथा पौभाकलाको सम्मिश्रण रहेको छ ।
