कृष्णबहादुर धामी
दार्चुला, चैत २२ गते । पछिल्लो समय राजनीतिक नेतृत्व र राजनीतिप्रति युवा माझ बढिरहेको तिब्र वितृष्णालाई कम गर्न युवाहरूलाई स्वदेशमै रोजगारीका अवसरहरू प्रदान गर्नसक्नु पर्नेमा सुदूरपश्चिम प्रदेश सरकार, सामाजिक विकास राज्यमन्त्री सरस्वती खड्काले जोड दिनुभएको छ ।
सदरमुकाम खलङ्गामा आज आयोजित सुरक्षित आप्रवासन (सामी) कार्यक्रमको सेवा प्रवाह सम्बन्धी छलफल तथा आप्रवासी स्रोत केन्द्र (सहायता कक्ष) को औपचारिक शुभारम्भ कार्यक्रममा बोल्दै राज्यमन्त्री खड्काले दक्ष युवा जनशक्तिलाई पलायन हुनबाट रोक्न सबै तहका सरकारले विभिन्न रोजगारीका अवसरहरू सिर्जना गरी स्वदेशमै रोजगारी दिनुपर्ने बताउनु भएको हो ।
तीनै तहका सरकारले युवाहरूका मागका आधारमा काम गर्नसके मात्रै उनीहरूमा बढेको राजनितिक वितृष्णा कम गर्न सकिने उहाँले बताउनुभएको छ । ‘युवाहरूलाई स्वदेशमै रोजगारीका अवसरहरू दिलाउन सबै तहका सरकारको यसै कार्यक्रम मार्फत ध्यानाकर्षण गराउन चाहन्छु राज्यमन्त्री खड्काले भन्नुभयो ।’ युवाहरूलाई सिपमुलक तालिम प्रदान गरी स्वदेशमै काम गर्ने वातावरण बनाउनु पर्नेमा उहाँको जोड छ । आफू राज्यमन्त्रीको हैसियतमा भएको भन्दै उहाँले प्रदेश सरकारबाट हुन सक्ने सहयोग गर्ने प्रतिबद्धता समेत जनाउनु भएको छ ।
अर्को प्रसङ्गमा बोल्दै राज्यमन्त्री खड्काले प्रदेश सरकारले निर्माण गर्ने वार्षिक बजेट पहुँच र पावरको आधारमा निर्माण हुने आरोप लाग्ने गरेको बताउनु भएको छ । प्रदेश सरकारका जनप्रतिनिधिहरूले जनताका आधारभूत आवश्यकतालाई सम्बोधन हुने गरी अबको बजेट निर्माण गर्नुपर्नेमा समेत जोडदिनु भएको छ । "आवश्यकता नै नभएका ठाउँहरूमा प्रदेशको बजेट गइरहेको म आफैले देखेको छु । यो कार्य सबैमिलि आजै बन्द गर्नुपर्छ," राज्यमन्त्री खड्काले भन्नुभयो । राज्यमन्त्री खड्काले मन्त्रालय अन्तर्गत पर्ने जिल्लाका सामाजिक विकास कार्यालय, स्वास्थ्य कार्यालय, जिल्ला अस्पताल लगायतका कार्यालयहरुको अनुगमन समेत गर्नुभएको छ ।
