साधन घर्ती
म्याग्दी (दरबाङ), चैत २१ गते । म्याग्दी सदरमुकाम बेनीमा सञ्चालित दुई दिने निःशुल्क मुटुरोग परीक्षण तथा उपचार शिविरबाट ११ सयभन्दा बढी लाभान्वित भएका छन् ।
जिल्ला समन्वय समिति म्याग्दीसहित जिल्लाका ६ वटै स्थानीय तहको आयोजना र शहीद गङ्गालाल राष्ट्रिय हृदयरोग केन्द्र काठमाडौंको प्राविधिक सहयोगमा मङ्गलबार र बुधबार सञ्चालित शिविरको पहिलो दिन पाँच सय ६५ र दोस्रो दिन पाँच सय ५० गरी एक हजार एक सय १५ जनाले सेवा लिएका हुन् । शिविर म्याग्दी बहुमुखी क्याम्पसमा सञ्चालन गरिएको थियो ।
शिविरमा परीक्षणपछि १३ जनालाई सहिद गंगालाल राष्ट्रिय हृदय रोग केन्द्रमा थप उपचारका लागि सिफारिस गरिएको जिल्ला समन्वय समितिका शाखा अधिकृत तथा शिविर संयोजक अमृत सुवेदीले जानकारी दिनुभयो । उहाँका अनुसार मुटुरोगी बिरामीलाई जयन्ति स्मृति प्रतिष्ठानले यातायातको व्यवस्था मिलाएको छ ।
यस्तै, शिविरमा नौ जना जन्मजात मुटुरोगीको पहिचान भएको छ । शिविरमा ग्रामीण क्षेत्रबाट धेरै मुटुरोगीहरुले उपचार तथा परीक्षण सेवा लिएको जिल्ला समन्वय समितिका उपप्रमुख डिलकुमारी खत्रीले जानकारी दिनुभयो । बेनीमै शिविर सञ्चालन हुँदा आफुहरुलाई सहज भएको जिल्लाको मालिका गाउँपालिका–४,च्युरीबोटबाट आउनुभएका तमबहादुर पुन मगरले बताउनुभयो ।
शिविरमा ५२ बढी प्रकारका औषधीहरु निःशुल्क वितरण गरिएको थियो । यसैगरी, ८७ जनालाई दुईदिने सिपिआर तालिम समेत प्रदान गरिएको छ ।
शिविरमा मुटुरोग विशेषज्ञबाट मुटुको परीक्षण तथा परार्मश, सुगर, इसिजी, इको तथा रक्त परीक्षण गरिएको शहीद गङ्गालाल राष्ट्रिय हृदय रोग केन्द्र काठमाडौंका निर्देशक डा. रवि मल्लले जानकारी दिनुभयो । शिविरमा प्रदेश अस्पताल बेनीले शिविरलाई सफल पार्न स्वाथ्यकर्मीहरू परिचालन गरेको थियो भने जिल्लास्थित विभिन्न सङ्घसंस्थाले स्वयंसेवक परिचालन गरेका थिए ।
