घर आगलागी हुँदा लाखौंको क्षति

चन्द्र पन्दाक
ताप्लेजुङ, चैत ११ गते । ताप्लेजुङको मेरिङ्देन गाउँपालिकास्थित एक घरमा आगलागी हुँदा लाखौं मूल्य बराबरको क्षति भएको छ । प्रहरीका अनुसार मेरिङ्देन गाउँपालिका–५ थुकिमाको सिङथाप टोलका सन्तोष तामाङको घर आइतबार जलेर नष्ट हुँदा लाखौंको क्षति भएको हो ।

जिल्ला प्रहरी कार्यालय ताप्लेजुङका सूचना अधिकारी एवम् प्रहरी निरीक्षक विवेक बस्नेतका अनुसार आगलागीबाट तामाङको काठ र जस्तापाताको प्रयोग गरेर बनाइएको दुई तले कच्ची घर पूर्णरुपमा नष्ट भएको छ । आगलागी हुँदा घरभित्र रहेको खाद्यान्न, केही सुनका गरगहाना, ७० हजार रुपियाँ नगद र अन्य सामग्रीसमेत जलेर नष्ट भएको छ । 

आगलागीबाट नागरिकतासहितका महत्त्वपूर्ण कागजातसमेत जलेर नष्ट भएको प्रहरी निरीक्षक बस्नेतले जानकारी दिनुभयो । उहाँकाअनुसार आगलागीबाट करिव छ लाख रुपियाँ बराबरको क्षति हुन गएको छ । घर नजिक रहेको पशुचौपायाका लागि खोले (चारो) पकाउने चुल्होबाट आगो सल्किएको प्रहरीले जनाएको छ ।