सल्यान समाचारदाता
सल्यान, चैत ६ गते । सल्यानको शारदा नदीमा पुल निर्माण भएको छ । त्रिवेणी गाउँपालिका–१, काभ्रा रामबजार र वडा नं. २ शङ्खपिपल जोड्ने शारदा नदीमा निर्माण गरिएको सो पुल कर्णाली प्रदेशका मुख्यमन्त्री यामलाल कँडेलले सोमबार उद्घाटन गर्नुभएको छ ।
यो पुल कर्णाली प्रदेश सरकारले निर्माण गरेको प्रदेशकै सबैभन्दा लामो पुल रहेको दाबी गरिएको छ । २०७९ सालमा सम्झौता भई निर्माण सुरु भएको सो पुल गत भदौमा ११ महिनामा सम्पन्न भएको पूर्वाधार विकास कार्यालय सल्यानले जनाएको छ । कार्यालयका प्रमुख नवीन थापाका अनुसार सात करोड एक लाख ३६ हजार लागतमा निर्माण गरिएको पुल ८४.३ मिटर लम्बाइ रहेको छ ।
पुल उद्घाटनपछि मुख्यमन्त्री कँडेलले जनताका आधारभूत आवश्यकता पूरा गर्न विगतका अलपत्र आयोजना सम्पन्न गर्नेतर्फ प्रदेश सरकार लागिपरेको बताउनुभयो । राज्यको लगानी भएका र अलपत्र परेका योजना सम्पन्न गर्नु पहिलो प्राथमिकता रहेको बताउनुभयो ।
यसअघि नदी तर्न कठिनाइ भोग्दै आएका स्थानीयले अब सहज रूपमा यात्रा गर्न पाउने छन् । त्रिवेणी गाउँपालिका अध्यक्ष खिमबहादुर रावतले पुल निर्माण भएपछि सर्वसाधारणको दैनिकी सहज हुने बताउनुभयो । त्रिवेणी–१, काभ्रामा रहेको विद्यालयमा अध्ययनरत विद्यार्थीलाई वर्षायाममा आवातजावतमा समस्या हुने गरेकामा पुल बनेपछि अब सहज भएको छ ।
कार्यक्रममा प्रदेश सरकरका भौतिक पूर्वाधारमन्त्री शेरबहादुर बुढा, उद्योग, वन तथा वातावरणमन्त्री सुरेश अधिकारी, पूर्वकृषिमन्त्री भीमप्रकाश शर्मा, प्रदेश सभा सदस्य लक्ष्मी सुनार, जिल्ला समन्वय प्रमुख बेलाराम रावल, गाउँपालिकाका निवर्तमान अध्यक्ष मानबहादुर डाँगी, कपुरकोट गाउँपालिकाका निवर्तमान अध्यक्ष भीमबहादुर सेनलगायत जिल्लाका विभिन्न कार्यालय प्रमुख र सुरक्षा निकायका प्रमुखको सहभागिता रहेको थियो । सो अवसरमा समयअगावै निर्माण सम्पन्न गरेकाले निर्माण कम्पनीलाई सम्मान गरिएको छ ।
