सुर्खेत समाचारदाता
सुर्खेत, चैत ६ गते । कर्णाली प्रदेशका १० जिल्लामध्ये नौ वटा कारागारमा क्षमताभन्दा बढी कैदीबन्दी रहेका छन् । अनौपचारिक क्षेत्र सेवा केन्द्र (इन्सेक) कर्णाली प्रदेशले सन् २०२४ मा गरेको अध्ययन अनुसार कर्णालीका कारागारको क्षमता ६५० जनाको छ तर एक हजार ९९ जना कैदीबन्दी रहेका छन् ।
कर्णालीको हुम्लामा कारागार छैन । त्यहाँ कैदीबन्दीलाई प्रहरी हिरासतमै राख्ने गरिएको छ । क्षमताभन्दा दोब्बर बढी कैदीबन्दी भएपछि उनीहरूलाई बस्न, सुत्न निकै सकस परेको छ । सुर्खेत कारागारको क्षमता ९० जनाको हो तर अहिले ३९३ जना रहेका छन् । ७० पुरुष क्षमतामा ३५४ जना र २० महिला क्षमतामा ३७ जना र दुई आश्रित बालबच्चा गरी ३९३ जना रहेको सुर्खेत कारागारका सूचना अधिकारी भुवन गौतमले बताउनुभयो ।
नयाँ बन्दीगृह बनेपछि पुरानो भवन भत्काइएको छ । नयाँ बन्दीगृहमा पनि क्षमताभन्दा पनि धेरै कैदीबन्दी राख्नु परेपछि समस्या बढेको उहाँले जनाउनुभयो । उहाँका अनुसार थुनुवा मात्रै १४९ जना रहेका छन् । यो सङ्ख्या क्रमशः बढ्दै गएको छ ।
इन्सेक कर्णाली प्रदेशको तथ्याङ्क अनुसार २५ जना क्षमताको सल्यान कारागारमा १४४ कैदीबन्दी रहेका छन् । रुकुमपश्चिम कारागारको क्षमता २५ जना रहेकामा अहिले १५६, जाजरकोट कारागारको क्षमता ३५ जना रहेकामा अहिले ७७ कैदीबन्दी रहेका छन् ।
यस्तै एक सय क्षमताको दैलेख कारागारमा अहिले १६३ जना, २५ क्षमताको कालीकोट कारागारमा अहिले ५४ जना, दुई सय क्षमताको जुम्ला कारागारमा अहिले १२४ जना र १५० क्षमताको डोल्पा कारागारमा अहिले २५ जना कैदीबन्दी रहेको इन्सेकको तथ्याङ्कमा छ । हुम्लामा कारागार नभएकाले त्यहाँ प्रहरी हिरासतमै राख्ने गरिएको छ ।
इन्सेक कर्णाली प्रदेश संयोजक नारायण सुवेदीले कर्णालीका कारागारमा कैदीबन्दीको सङ्ख्या बढ्दै जाँदा उनीहरूको मानव अधिकार हननको जोखिम कायमै रहेको बताउनुभयो ।
