खलङ्गा समाचारदता
जाजरकोट, चैत ६ गते । जाजरकोटको कुसे गाउँपालिकामा विद्युत् विस्तारमा ढिलासुस्ती भएपछि स्थानीयवासी आक्रोशित भएका छन् । नेपाल विद्युत् प्राधिकरण जाजरकोट वितरण केन्द्रले कुसे गाउँपालिकामा विद्युत् बाल्न निर्माण व्यवसायीले गरेको काममा ढिलासुस्ती गरेपछि स्थानीय आक्रोशित भएका हुन् । कुसे गाउँपालिका–५ का दलबहादुर थापाले कार्यालय र निर्माण व्यवसायीको लापर्बाहीले पालिकावासी अँध्यारोमा बस्न बाध्य भएको बताउनुभयो । बत्ती नहुँदा बालबालिकालाई पठनपाठन गर्न, घरधन्दाको काम गर्न समस्या भएको छ ।
आर्थिक वर्ष २०७५/७६ मा नेपाल विद्युत् प्राधिकरण जाजरकोट वितरण केन्द्रसँग कुसे गाउँपलिका–५, पाँचकाटिया, खुर्पा साँधिबिसाउन, समाकोट हुँदै पैङ्कसम्मको लागि पोल गाड्ने, तार तान्ने काम तीन महिनामा सम्पन्न गर्ने गरी शाही बाबा एन्ड तारा कन्स्ट्रक्सन र साँधिबिसाउनदेखि कुसे गाँउपालिकाको प्रशासनिक केन्द्र थर्पुभार्मसम्म जेएस कन्स्ट्रक्सनले सम्झौता गरेका थिए । लामो समय बित्दा पनि निर्माण व्यवसायीले लापर्बाही गरेपछि कुसे गाउँपालिकाका सर्वसाधारण बिजुली बाल्नबाट वञ्चित भएका छन् । नेपाल विद्युत् प्राधिकरण जाजरकोट वितरण केन्द्रका प्रमुख शङ्करसिंह ठकुरीका अनुसार कुसे गाउँपालिकामा विद्युत् विस्तारका लागि जिम्मा लिएका काम सम्पन्न गर्न निर्माण व्यवसायीलाई ताकिता गरिएको बताउनुभयो । प्राधिकरण जाजरकोट वितरण केन्द्रका प्राविधिक योगेन्द्र झाले निर्माण कम्पनीले गरेको सम्झौता अवधि सकिएको जनाउनुभयो ।
शाही बाबा एन्ड तारा कन्स्ट्रक्सनले दुई पटक थपेको म्याद सकिएको छ भने जेएस कन्स्ट्रक्सनले जिम्मा लिएका काम अन्तिम चरणमा पुगेको छ । निर्माण व्यवसायीले काम सम्पन्न गरी कार्यालयलाई बुझाएलगत्तै गाउँबस्तीमा विद्युत् जडान गरिने उहाँले जनाउनुभयो । शाही बाबा एन्ड तारा कन्स्ट्रक्सनका तेजविक्रम शाहले कुसे गाउँपालिका–५, दम्दालागाउँमा करिब छ महिनाअघि बत्ती बलेको र त्यहाँदेखि ढिमेगाउँसम्म एक हप्ताभित्र बत्ती बाल्ने प्रयास भएको दाबी गर्नुभयो ।
