राजनीतिक स्थायित्वका लागि कांग्रेस एमाको सरकार : उपप्रधानमन्त्री सिंह

रेखीराम राना

तानसेन, चैत २ गते । नेपाल सरकारका उपप्रधान एवं शहरी विकास मन्त्री प्रकाशमान सिंहले राजनीतिक स्थायित्वका लागि वर्तमान सरकार बनेको बताउनुभएको छ । 

नेपाल पत्रकार महासङ्घ पाल्पा शाखाले शनिबार तानसेनमा गरेको पत्रकार भेटघाटमा बोल्नुहुँदै उपप्रधानमन्त्री सिंहले राजनीतिक स्थिरताका लागि कांग्रेस र एमाले मिल्नुपर्ने अवस्था आएको बताउनुभयो । 

विगतमा राजनीतिक स्थिरता नहुँदा सरकारले काम गर्न नसकेको र जनतामा निरासा छाएको बताउँदै उहाँले सरकारको स्थिरताले मात्रै जनअपेक्षा अनुसार काम गर्न सकिने धारणा राख्नुभयो । वर्तमान सरकारले जनताको चाहना पूरा गर्न कानुन निर्माण र समृद्धि हासिल गर्नमा ध्यान दिएको उहाँको भनाई छ । 

नयाँ संविधान जारी भएपछि तीव्र गतिमा देशको विकास होस् भन्ने जनचाहना रहेको उल्लेख गर्नुहुँदै उहाँले सरकारले कानुन बनाएर जनताको काम गर्ने कुरामा ध्यान दिएको सिंहले बताउनुभयो । विगतको सरकार बनेपछि विभिन्न काण्ड सुनिने गरेकोमा वर्तमान सरकार आएपछि कुनै पनि काण्ड तथा नराम्रो काम सुन्न नपरेको उहाँले दावी गर्नुभयो ।  

राजावादीहरूको गतिविधि बढेपनि राजतन्त्र आउने सम्भावना नरहेको सिंहको जिकिर छ । सङ्घीय लोकतान्त्रिक गणतन्त्र नेपाली जनताको वलिदानी र सङ्घर्षबाट आएकाले राजा ल्याउने कुरा गणतन्त्रवादीका लागि स्वीकार्य नहुने उहाँले स्पष्ट पार्नुभयो । संविधानअनुसार राजावादीहरूले सभा र प्रदर्शन गर्न पाउने भएपनि राजतन्त्र ल्याउने कुरा स्वीकार गर्न नसकिने उहाँको भनाई छ ।

पूर्व पदाधिकारीहरूको सेवा सुबिधाको बारेमा यस अघिको सरकारले नै निर्णय गरेर कार्यान्वयन गरेको र हाल मन्त्री परिषद्बाट सैद्धान्तिक स्वीकृति दिएर कानुन बनाउन गृहमन्त्रालयले काम गर्ने कुरा भएको उहाँको भनाई छ । 

पछिल्लो समय सामाजिक सञ्जाल र केही सञ्चारमाध्यम्बाट आम जनतामा अझै निरासा छाउने कुरा समाचारमा आइरहेको बताउँदै उहाँले व्यवस्थामाथि प्रश्न उठ्ने गरी झुठो कुरा सम्प्रेषण गर्न नहुनेमा जोड दिनुभयो । सोसल मिडियाले दिएको सूचना, समाचार सत्यतथ्य कुरा ठीक हो, वा होइन भन्ने कुरा बुझेर मात्र धारणा बनाउन मन्त्री सिंहले आग्रह छ ।