कैलाली समाचारदाता
धनगढी, फागुन ७ गते । सुदूरपश्चिम प्रदेशका मुख्यमन्त्री कमलबहादुर शाहले आफूसँग काम गर्न असहज लाग्नेले मन्त्री पदबाट राजीनामा दिँदा हुन्छ भनी अभिव्यक्ति दिनुभएको छ । कञ्चनपुरको महेन्द्रनगरमा सोमबार आयोजित आर्थिक मामिला मन्त्रालय र नीति तथा योजना आयोगको आर्थिक वर्ष २०८१/८२ को अर्धवार्षिक समीक्षा गोष्ठीलाई सम्बोधन गर्दै उहाँले सो अभिव्यक्ति दिनुभएको हो । मुख्यमन्त्री शाहले स्पष्ट रूपमा भन्नुभयो, “मसँग असहज मान्ने मन्त्रीले राजीनामा दिएर जाँदा हुन्छ र कर्मचारीले पनि सरुवा लिएर जान सुझाव छ ।”
विभिन्न किसिमका तर्क दिएर बजेट कार्यान्वयन ढिला गराउने र अल्झाउने काम कसैले नगर्दिनुहोला भन्दै उहाँले कुनै मन्त्री र राज्यमन्त्रीलाई काम गर्न असहज छ भने राजीनामा दिए हुन्छ, कर्मचारीलाई असहजता महसुस भएको छ भने सरुवा लिएर गए हुन्छ तर सुशासन र जनतालाई सेवासुविधा दिने कुरामा कोही कसैसँग सम्झौता नहुने बताउनुभयो ।
मुख्यमन्त्री शाहले बजेट निर्माण गर्दा केही न केही मापदण्ड बनाएर अघि बढ्नु पर्छ, त्यसो गर्न सके जनताका काम सहज रूपमा हुने बताउनुभयो । उहाँले जनतालाई सेवासुविधा दिने क्रममा कुनै समस्या आए आफूले समाधान गर्ने र त्यसका लाग जेल जानु परे जान पनि तयार रहेको बताउनुभयो ।
मुख्यमन्त्री शाहले बजेटमा बजेटलाई जनतामुखी र उत्पादनमुखी बनाउन सकिन्छ त्यसका लागि स्पष्ट खाका लिएर आउन निर्देशन दिनुभयो । सही ढङ्गले काम गरे अहिलेकै कर्मचारीले धेरै हुने बताउँदै उहाँले कर्मचारी अभावका कारण कार्यसम्पादन कम भएको भन्ने कुरा गलत रहेको बताउनुभयो ।
उहाँले सो अवसरमा चालु वर्षका आयोजना पनि के कसरी अगाडि बढ्दै छन्, तालिकासहित मुख्यमन्त्री कार्यालयलाई जानकारी गराउन पनि निर्देशन दिनुभयो । गत वर्ष साढे ३६ अर्बको बजेट साढे २९ अर्बमा ल्याउने हिम्मत पनि आफैँले गरेको दाबी पनि उहाँले गर्नुभयो । सो कार्यक्रममा पूर्वमुख्यमन्त्री राजेन्द्रसिंह रावल, प्रदेश सरकारका मन्त्री, राज्यमन्त्री, प्रदेश सभा सदस्य, प्रमुख सचिव, सबै मन्त्रालयका सचिवको सहभागिता रहेको थियो ।
