गोरखापत्र समाचारदाता
काठमाडौँ, फागुन १ गते । एक्टिङ रियालिटी सो ‘एक्टिङ स्टार’ को प्रि–जज अडिसन सम्पन्न भएको छ । ‘एक्टिङ स्टार’ मा भाग लिन एक हजारभन्दा बढीले डिजिटल अडिसनमार्फत भिडियो पठाएका थिए । तीमध्येबाट २२२ जनालाई प्रि–जज अडिसनका लागि छानिएको थियो । अडिसनमा सहभागीलाई आफूले तयार गरेको अभिनय कला प्रस्तुत गर्ने मौका प्रदान गरेको आयोजक महक मिडिया नेटवर्कले जनाएको छ ।
अडिसनमा नेपालबाहेक भारतको सिक्किम, दार्जिलिङ, पश्चिम बङ्गाल, मुम्बई र दुबईमा रहेका नेपाली भाषी सहभागी भएका थिए । गायन र नृत्यको मात्र रियालिटी सो सञ्चालन भइरहेको अवस्थामा ‘एक्टिङ स्टार’ आउने खबरले सानादेखि ठुला उमेरका सबैलाई उत्साही बनाएको आयोजकले जनाएको छ । वरिष्ठ कलाकार नीर शाह, अनुप बराल र अभिनेतृ ऋचा शर्माले ‘एक्टिङ स्टार’ को छनोट गर्नुहुने छ ।
