सुन्तलाबाट बाइस करोडभन्दा बढी आम्दानी

जाजरकोट समाचारदाता

जाजरकोट, माघ २१ गते । जाजरकोटमा उत्पादित सुन्तला बिक्रीबाट २२ करोड रुपियाँभन्दा बढी आम्दानी भएको छ । 

कृषि विकास कार्यालय जाजरकोटका अनुसार यस वर्षमा सुन्तला बिक्रीबाट जिल्लाका किसानले २२ करोड दुई लाख ७१ हजार ५०८ रुपियाँ आम्दानी गरेका छन् । 

कार्यालयका अनुसार जिल्लाबाट करिब दुई हजार ७५३ मेट्रिक टन सुन्तला निर्यात भएको छ । जिल्लामा कुल ६७० हेक्टर क्षेत्रफलमा सुन्तला खेती गरिँदै आएको छ । कार्यालयका सूचना अधिकारी नवीनराज आचार्यले गत वर्षको तुलनामा किसानले बोटबाटै राम्रो मूल्य पाएका कारण सुन्तलाको बजारीकरणमा समस्या नपरेको जानकारी दिनुभयो ।

यस वर्ष बोटबाटै ५० देखि ८० रुपियाँ प्रतिकिलोग्रामसम्म सुन्तला बिक्री भएको छ । किसानले सुरुमा बोटबाटै ५० रुपियाँमा बिक्री गरेकोमा अन्तिम समयसम्म प्रतिकेजी ८० रुपियाँसम्म मूल्य पाएका थिए । 

जिल्लाको कुसे गाउँपालिका, नलगाड नगरपालिका, छेडागाड नगरपालिका, शिवालय गाउँपालिका, भेरी नगरपालिका, बारेकोट गाउँपालिकामा सुन्तला उत्पादन हुने गरेको छ । किसानको खेतबारीमै पुगेर मल प्रयोग, काँटछाँट तथा औषधी दिनेसम्मको प्राविधिक सहायता दिएर किसानलाई सहयोग गरिरहेको सूचना अधिकारी आचार्यले बताउनुभयो ।

कुसे–५, दमदालाका किसान शिवबहादुर मल्लले पछिल्लो समय सुन्तला खेतीबाट राम्रो आम्दानी गरिरहेको बताउनुहुन्छ । पहिले सुन्तलाका लागि बजारको समस्या रहेको भए पनि अहिले सुर्खेत, नेपालगन्जबाट व्यापारीहरू बारीमै पुग्ने गरेको उहाँले जानकारी दिनुभयो । 

पहिले अन्नबाली लगाउने खेतबारीलाई किसानले आजकल सुन्तला बारी बनाउन लागेको कुसे–५, ढिमेका प्रेम मल्ल बताउनुहुन्छ । खेतीपातीभन्दा सुन्तलाबाट निकै आम्दानी हुन थालेपछि यसतर्फ आकर्षित भएको उहाँको भनाइ छ । 

पछिल्लो समय जिल्लामा प्रधानमन्त्री कृषि आधुनिकीकरण  परियोजना, कृषि विकास कार्यालयलगायत निकायबाट कृषकका लागि प्राविधिक तथा यान्त्रिकीकरणको सहयोग हँुदै आएको छ । प्रधानमन्त्री कृषि आधुनिकीकरण परियोजना जाजरकोटका निमित्त प्रमुख गणेशबहादुर थापाले परियोजनाबाट जोन तथा सुपरजोनसमेत गरेर ६७० हेक्टर क्षेत्रफलमा सुन्तला खेतीका लागि विभिन्न सहयोग गरिँदै आएको बताउनुभयो ।