परिवर्तनको उपलब्धि रक्षा गर्दै अघि बढनुपर्छ : प्रदेश प्रमुख भण्डारी

धर्बेन्द्र झा 

जनकपुरधाम, माघ १६ गते । मधेश प्रदेशका प्रदेश प्रमुख सुमित्रा सुवेदी भण्डारीले नेपालमा भएका विभिन्न खालका आन्दोलनबाट भएका परिवर्तनका उपलब्धिलाई रक्षा गर्दै जनतालाई सहिदले देखाएको बाटोमा डोर्‍याएर अघि बढनुपर्ने बताउनु भएको छ ।

सहिद दिवस २०८१ को अवसरमा विभिन्न आन्दोलनको क्रममा सहादत्त भएका ज्ञात अज्ञात सहिदप्रति श्रद्धान्जली व्यक्त गर्दै बुधबार जारी गर्नु भएको सन्देशमा उहाँले यस्तो बताउनु भएको हो । उहाँले प्राप्त प्रजातन्त्रको जगमा उभिएर मुलुकमा स्थाई शान्ति कायम गरी समृद्धि र विकासको बाटोमा हामी सबै अघि बढेमा सहिदको सम्मान हुने उहाँको भनाइ छ । 

उहाँले मुलुकमा राजनीतिक परिवर्तनका लागि ठुला आन्दोलन भई प्रजातन्त्र स्थापना भएको र यस क्रममा धेरै नेपाली नागरिकले बलिदानी दिएको सन्देशमा उल्लेख गर्नुभएको छ । 

यता धनुषाको विभिन्न स्थानमा सहिद दिवसको अवसरमा विभिन्नखालका कार्यक्रमको आयोजना गरिए पनि मधेश प्रदेश सरकारले औपचारिक रूपमा कुनै कार्यक्रमको आयोजना नगरेको गृह मन्त्रालयका अधिकृत टेकविक्रम शाहले बताउनुभयो ।