राष्ट्रिय स्वार्थलाई प्राथमिकतामा राख्न मिसन प्रमुखलाई परराष्ट्रमन्त्रीको निर्देशन

काठमाडौँ, माघ ३ गते। परराष्ट्र मन्त्री डा. आरजु राणा देउवाले विश्वमा रहेका सबै नेपाली मिसन प्रमुखलाई नेपालको राष्ट्रिय स्वार्थ र आर्थिक कूटनीतिलाई उच्च प्राथमिकतामा राखेर काम गर्न निर्देशन दिनुभएको छ।

मन्त्री डा. राणाले विदेशमा रहेका सबै नेपाली मिसन प्रमुखलाई बिहीबार मन्त्रालयबाट भर्चुअल सम्बोधन गर्दै सो दिर्नेशन दिनुभएको हो।

उहाँले भन्नुभयो “आर्थिक कूटनीति पनि नेपालको परराष्ट्र नीतिको एक अभिन्न अङ्गका रुपमा हामीले अघि बढाइरहेकाले नेपालको विकासको आकांक्षा र आर्थिक बृद्धिका लागि सहयोग पुर्याउने गरी कुनै पनि क्षेत्रको अन्वेषणमा लाग्नुहोस्, जसले नेपालमा आर्थिक लगानी आकर्षित गर्न सहयोग पुगोस्।”

आफू रहेका देश तथा स्थानका सम्भावनालाई नेपालसँग जोडेर त्यसबाट नेपालले कसरी लाभ लिन सक्छ र नेपालको आर्थिक विकासका प्रयासलाई कसरी थप प्रभावकारी बनाउन सकिन्छ भन्ने बारेमा सोचेर काम गर्न मिसन प्रमुखलाई उहाँको सुझाव थियो। 

मुलुकको विकास र राष्ट्रिय समृद्धिको आकांक्षालाई परिपूर्ति गर्न परराष्ट्र मन्त्रालयले नीतिगत रूपमा नै आर्थिक कूटनीतिलाई समग्र कूटनीतिको प्राथमिकतामा राखेर अलग्गै महाशाखामार्फत् काम गर्न लागेकाले नेपालका सबै मिसनले आर्थिक कूटनीतिका मध्यमबाट नेपालमा प्रत्यक्ष वैदेशिक लगानी भित्र्याउने काममा लाग्नुपर्ने उहाँको भनाइ थियो।   

मन्त्री डा. राणाले भन्नुभयो “विविध कारणले नेपाली अर्थतन्त्रले अपेक्षित गति लिन नसकिरहेको वर्तमान अवस्थामा विदेशस्थित सबै नेपाली मिसनले आर्थिक कूटनीतिका माध्यमबाट आफू रहेका देशबाट नेपालमा लगानी आकर्षित गर्दै यहाँका सम्भावनाहरुलाई विश्व बजारसम्म पुर्याउन आवश्यक देखिएको छ।”

मन्त्री डा. राणाले नेपाली उत्पादन एवं पर्यटनको सम्भावनालाई विश्व बजारमा प्रवर्द्धन गर्ने कामका लागि आफू रहेका स्थानमा समय समयमा आयोजना हुने मेला, महोत्सव एवं प्रदर्शनीमा सहभागी हुन पनि आग्रह गर्नुभएको छ। 

नेपालले आगामी दिनमा जलवायु परिवर्तनका कारण भोग्नसक्ने समस्यालाई ध्यानमा राखेर जलवायु न्यायको विषयलाई विश्वव्यापी रुपमा पैरवी गर्नुपर्ने अवस्था आएकोतर्फ ध्यानाकर्षण गराउँदै निकट भविष्यमै नेपालमा आयोजना हुन लागेको सगरमाथा सम्वाद कार्यक्रमको सफलताका लागि पनि आआफ्ना ठाउँबाट लाग्न मन्त्री डा. राणाले सबैलाई आग्रह गर्नुभयो। 

मन्त्री डा. राणाले परराष्ट्र मन्त्रालयका लागि तत्कालै आवश्यक रहेको थप जनशक्ति परिपूर्ति गर्न हालै गरिएको संगठन तथा व्यवस्थापन सर्भेबाट सहयोग पुग्ने बताउँदै यसबाट परराष्ट्र मन्त्रालय र नियोगको कार्यसम्पादनमा चुस्तता र प्रभावकारिता ल्याउने अपेक्षा रहेको बताउनुभयो।

विदेशमा रहेको ठूलो नेपाली समुदायलाई आवश्यक पर्ने सेवा प्रदान गर्न, उनीहरुको हितको रक्षा गर्दै खाँचो र आवश्यकतामा ध्यान दिन तथा उनीहरुका  समस्या र गुनासामा सहजै उपलब्ध भइदिन पनि सबै मिसन प्रमुखलाई निर्देशन दिनुभयो।   

परारष्ट्र सचिव अमृतबहादुर राईले आफू रहेका देशका नीति एवं कार्यक्रमलाई नेपालको स्वार्थअनुकुल बनाउन तथा विदेशमा रहेका नेपालीको हक हितको रक्षा गरी वैदेशिक रोजगारीमा रहेको ठूलो नेपाली समुदायको हितको प्रवर्धनमा लाग्न निर्देशन दिनुभएको परराष्ट्रमन्त्रीको निजी सचिवालयले जनाएको छ।