ललितपुर, माघ ३ गते । ललितपुर महानगरपालिकाका प्रमुख चिरिबाबु महर्जनले ललितपुर महानगरलाई स्मार्ट सिटीको रुपमा विकास गर्ने योजनामा अघि बढिसकेको बताउनुभएको छ ।
बिहीबार राष्ट्रिय भूकम्प सुरक्षा दिवसको अवसरमा लतिपुरमा आयोजित ‘भूकम्प र विपद् जोखिम व्यवस्थापन’ विषयक कार्यशाला गोष्ठीमा बोल्नुहुँदै उहाँले यस्तो बताउनुभएको हो ।
उहाँले महानगरलाई स्मार्ट सिटी बनाउनका लागि पोखरीहरुको पुनर्निर्माण सम्पन्न भइसकेको जानकारी दिनुभयो । उहाँले वतावरणीय सुधार महानगरको प्राथमिकतामा रहेको बताउनुभयो ।
ललितपुर महानगरभित्र खुला ठाउँ नभएका कारण केही समस्या भइरहेको उहाँको भनाइ छ । प्रमुख महर्जनले स्मार्ट सिटी बनाउनका लागि कम्तीमा १० प्रतिशत खुला ठाउँको आवश्यकता रहेकोमा महानगरसँग तीन प्रतिशत मात्र खुला ठाउँ रहेको बताउनुभयो ।
उहाँले पहिले नै नेपाल आर्मीलगायतले खाली ठाउँ लगिसकेका कारण अब कसैलाई पनि जमिन नदिने नीति लिएको बताउनुभयो ।
उहाँले भन्नुभयो, ‘‘अहिले हामी ललितपुर महानगरलाई स्मार्ट सिटी बनाउने योजनामा छौं । तर स्मार्ट सिटी बनाउनका निमित्त कम्तीमा पनि १० प्रतिशत ठुला ठाउँको आवश्यकता छ । हामीसँग तीन प्रतिशत मात्र खुला ठाउँ छ । खुला ठाउँ नभएकै कारण अहिले मर्निङ वाक र इभनिङ वाक गर्न पाइँदैन । मैले प्रमुख भएपछि कुनै पनि माइकालाललाई एक आना जमिन पनि नदिने नीति लिएको छु । पहिले नै सबै लिसक्यो अहिले मसँग तीन प्रतिशत मात्र जग्गा बाँकी छ । म यो चाहिँ घटाउन चाहन्न ।’’
उहाँले महानगरलाई स्मार्ट सिटी बनाउन सङ्घीय सरकारले पनि आवश्यक सहयोग गर्नुपर्ने बताउनुभयो ।
