इमान सिं राना
पाल्पा, मङ्सिर २ गते । पाल्पाको रामपुरमा अचेत अवस्थामा फेला परेका महिलाको मृत्यु भएको छ । रामपुर नगरपालिका(३, बगाहाका ६५ वर्षीय सुकमाया गिरी सारू शनिवार साँझ अचेत अवस्थामा फेला पर्नु भएको थियो ।
बगाहा बाट सीता कुण्ड जाने कच्ची सडक खण्डको पश्चिम पट्टी नालीमा फेला पर्नु भएका उहाँलाई उपचारको लागि रामपुर अस्पताल पठाइएको थियो । चिकित्सकले चेकजाँच पश्चात् मृत घोषणा गरेको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिनुभयो ।
शव पोस्टमार्टमका लागि रामपुर अस्पतालमा राखिएको छ । घटना सम्बन्धमा थप अनुसन्धान भइरहेको प्रहरीले जनाएको छ ।
