विदेशबाट फर्केर पशुपालनमा दाजुभाइ

ठाकुरप्रसाद आचार्य 

म्याग्दी, कात्तिक २५ गते । म्याग्दीको अन्नपूर्ण गाउँपालिका–६ बिरौटाका कृष्ण र शिव खड्काले वैदेशिक रोजगारीबाट गाउँ फर्किएर थालेको व्यावसायिक पशुपालनबाट राम्रो आम्दानी लिनुभएको छ । 

चार वर्षअघि दुबईबाट दाजु कृष्ण र भाइ शिव कतारबाट घर फर्किएर पशुपालन थाल्नुभएको हो । चार भैँसीबाट सुरु गरेको पशुपालनमा खड्का दाजुभाइको लगानी अहिले एक करोड रुपियाँभन्दा माथि पुगेको छ । 

धौलागिरि बहुउद्देश्यीय कृषि तथा पशुपन्क्षी फार्म दर्ता गरी पशुपालन र सुन्तला खेती गर्नुभएको छ । खड्का दाजुभाइको पशुपालन फार्मबाट अहिले मासिक रूपमा साढे पाँच लाख देखि ६ लाख रुपियाँसम्मको दुध बिक्री हुन्छ । सबै खर्च कटाएर मासिक दुई लाख रुपियाँसम्म बचत हुने गरेको शिव खड्काले बताउनुभयो । फार्ममा अहिले मुर्रा जातका १५ वटा भैँसी र दश वटा होलिस्टिन जातका गाई छन् । 

एउटा गाईले एक छाकमा ८ लिटर र भैँसीले ६ लिटरसम्म दूध दिने खड्काले बताउनुभयो । गाईभैँसी गरेर दैनिक रूपमा डेढ सयदेखि दुईसय लिटरसम्म दुध उत्पादन हुने गरेको उहाँले बताउनुभयो । दुधको बजारीकरण गर्ने उद्देश्यले गाउँमै सिद्ध बहुउद्देश्यीय सहकारी संस्थाले सङ्कलन केन्द्र स्थापना गरेको उहाँको भनाइ छ । 

गाईभैँसीमा आज लगानी गरे भोलिदेखि आम्दानी लिन सकिने पेसा भएकाले दाजुभाइले पशुपालन व्यवसाय रोजेको उहाँले बताउनुभयो । बाबुबाजेको जग्गा बाँझै राखेर बिदेसिएका दाजुभाइको प्रदेशमा सोचेजस्तो कमाइ भएको थिएन । अरूको देशमा साहुको अधीनमा बसेर काम गर्नुभन्दा आफ्नै माटोमा पसिना बगाउने अठोट लिएर दाजुभाइ स्वदेश फर्किनुभएको थियो । विदेशमा नै दुई भाइले पशुपालन गर्ने योजना बनाएर गाउँ फर्किएको खड्काले बताउनुभयो । 

दुईभाइ नै विदेश पुगेपछि यहाँको जग्गा बाझिन थाल्यो, बाबुबाजेको जमिन बाँझो हुँदा विदेशमा राम्रोसँग निद्रा लागेन त्यही भएर २६ महिनामा नै गाउँ फर्किएर पशुपालन थालेको खड्काले बताउनुभयो ।  

शिव खड्काले भन्नुभयो, ‘‘गाई भैँसी पाल्ने, बाँझो रहेको जग्गा जमिनमा सुन्तला र कागती खेती गर्ने योजना बनाएर दाइ स्वदेश फर्किएको एकवर्ष पछि म पनि फर्किएँ, अहिले दुईभाइ मिलेर पशुपालन गरेका छौँ । सोचेजस्तो सफलता मिलेको छ ।’’ 

परिवारका चारजना सदस्य र थप दुई जना कामदार गरेर ६ जना दैनिक रूपमा काममा खटिने उहाँको भनाइ छ । ‘‘विदेश गएर अरूको काम गर्दा आत्मसन्तुष्टि मिलेको थिएन । अहिले परिवार सबैजना मिलेर पशुपालनमा काम गर्दा आत्मसम्मानका साथै सन्तुष्टि पनि मिलेको छ । विदेशभन्दा हामी दाजुभाइलाई यही रमाइलो लागेको छ’’ उहाँले भन्नुभयो ।   

खड्का दाजुभाइले गाउँपालिका केन्द्र पोखरेबगरमा दुध बिक्री गर्न डेरी पसल समेत खोल्नुभएको छ । डेरीबाट दुधका साथै चिज, पनिर दही बिक्री गर्दै आउनुभएको छ । पोखरेबगर, भुरुङ–तातोपानी, नारच्याङ र जोमसोमसम्म दुध बिक्री हुने खड्काले बताउनुभयो । 

प्रतिलिटर एकसय २० रुपियाँमा दुध बिक्री गर्ने गरेको उहाँको भनाइ छ । अहिले हाम्रो बजार मुस्ताङसम्म विस्तार भएकाले दुधको मागअनुसार पुगाउन कठिन भएको उहाँको भनाइ छ । दुधको माग बढेसँगै पशुपालन व्यवसायलाई थप विस्तार गर्ने योजना बनाएको खड्काले बताउनुभयो ।  

४५ रोपनी क्षेत्रफल भएको जमिनमध्ये २५ रोपनीमा खड्का दाजुभाइले सुन्तला खेती गर्नुभएको छ । बाँकीमा गाईभैँसीलाई आवश्यक पर्ने घाँस लगाउनुभएको छ । आफ्नो परिवारसँग बस्न पाइने र समाजको सेवा पनि गर्न पाइने भएकाले पशुपालनमै दाजुभाइलाई सन्तुष्टि मिलेको कृष्ण खड्काले बताउनुभयो ।