सन्तोष सुवेदी
कास्की, असोज १० गते । गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाले अभिभावकमुखी शिक्षालाई प्रभावकारी बनाउन निर्देशन दिनुभएको छ ।
शिक्षा विकास निर्देशनालय पोखराले आयोजना गरेको माध्यमिक शिक्षा परीक्षा कक्षा १० को अभिलेख संशोधन र शैक्षिक तथ्याङ्क सम्बन्धी अभिमुखीकरण कार्यक्रममा उहाँले शिक्षा क्षेत्रमा सुधार ल्याउन अभिभावकमुखी शिक्षालाई जोड गर्नुपर्ने बताउनुभएको हो ।
“मन्त्रालयले राखेको अभिभावकमुखी शिक्षा नयाँ कार्यक्रम हो । यसलाई प्रभावकारी बनाउन आवश्यक छ । शैक्षिक क्षेत्रलाई सुदृढीकरण गर्न यस्ता कार्यक्रमले मदत पुग्छ,” उहाँले भन्नुभयो, "मन्त्री थापाले तथ्याङ्कको विश्वसनीयतामा शङ्का नआउने गरी यथार्थपरक तथ्याङ्क उपलब्ध गराउनुपर्ने आवश्यकतालाई औँल्याउनुभएको छ ।"
उहाँले तीनै तहको सरकार मिलेर नै शिक्षा क्षेत्रमा सुधार ल्याउन सकिने उल्लेख गर्नुभयो । घोकन्ते विद्या भन्दा पनि संस्कारमुखी शिक्षा आजको आवश्यकता रहेको उहाँको भनाई छ । फलस्वरुप मन्त्रालयले यसपालिको बजेटमा समेत व्यावसायिक र नैतिकवान शिक्षालाई जोड दिएको उहाँले बताउनुभयो ।
'फ्राइडे फर फ्युचर', सिक्दै कमाउँदै, अभिभावक शिक्षा लगायतका कार्यक्रम महत्त्वपूर्ण रहेको र यसको प्रभावकारी कार्यान्वयनका लागि मन्त्री थापाले सम्बन्धित सबैलाई निर्देशन दिनुभएको छ । गण्डकी प्रदेश सरकारका प्रमुख सचिव रघुराम विष्टले कक्षा १० का विद्यार्थीको सर्टिफिकेटमा नामथर, जन्ममितिका बारेमा ध्यान दिन आवश्यक रहेको बताउनुभयो । जसका लागि अभिभावकमुखी शिक्षा प्रभावकारी हुने भनाई उहाँको छ । सही तथ्याङ्कको आवश्यकतालाई उहाँले जोड दिनुभयो ।
सामाजिक विकास, युवा तथा खेलकुद मन्त्रालयका निमित्त सचिव तोयानाथ लम्सालले प्रदेश स्तरमा शैक्षिक तथ्याङ्कको विश्वसनीयता बढाउने उद्देश्यले कार्यक्रमको आयोजना गरिएको जानकारी दिनुभयो । उहाँले मन्त्रालयले बिग्रँदो, हराउँदो संस्कारलाई परिवर्तन गरी समाज र व्यक्तिलाई सुधार गर्न शिक्षाको क्षेत्रमा नयाँ कार्यक्रम ल्याएको उल्लेख गर्नुभयो । मन्त्रालय अन्तर्गत प्रदेशका ११ वटै जिल्लाका विभिन्न कार्यालयहरूलाई प्रभावकारी बनाउन साझेदारी मोडलमा बजेट विनियोजन गरेको जानकारी उहाँले गराउनुभयो ।
शिक्षा निर्देशनालय पोखराका प्रमुख अम्बिका आचार्यले मुस्कान सहितको गण्डकी प्रदेश बनाउन शिक्षा र स्वास्थ्य क्षेत्रमा सुधार ल्याउन विविध कार्यक्रमको आयोजना गर्दै आएको उल्लेख गर्नुभयो ।
कार्यक्रम असोज १० र ११ गते दुई दिन सम्म चल्ने उहाँले बताउनुभयो । कार्यक्रममा ११ जिल्लाका शिक्षा विकास तथा समन्वय इकाई प्रमुखहरू र ८५ वटै पालिकाका शिक्षा, युवा तथा खेलकुद शाखाका प्रमुखहरूको सहभागिता रहेको छ ।
